Nikanni laman, kinomentuan na lider ira na nasion, scientist ira, anna technologist ira i pakawayya na artificial intelligence (AI). Kinagi da nga makoffun yaw, ngem mavurung gapa ira nga awayya na nga marake i pangusan na tanakuan taw.

•   “Tadday i AI ta pinakamakasta nga teknolohia sangawe, awayya natun nga mapakasta i pattolay tam . . . Ngem awayya gapa natun nga pappeligrowan i seguridad, daralan i civil rights anna privacy tam, anna alsan i pattalo na totolay ta demokrasia.”—Kamala Harris, vice president na United States, Mayo 4, 2023.

•   “Maski nu aru i awayya na meyuffun na artificial intelligence (AI) ta panguru, awayya na gapa nga pappeligrowan i pisikal anna emosional nga gawa-gawayyan na totolay,” nitura na internasional nga grupo na doktor ira anna health-care expert ira nga nirolluan ni Dr. Frederik Federspiel, ta artikulo nga nepublisa ta Mayo 9, 2023, ta BMJ Global Health. a

•   “Awayya ngana meyusa i AI ta pangiwara tu mali ira nga informasion. Awayya na nga aru gapa i mapawan tu trabahu. Mavurung i technologist ira nga awayya natun pappeligrowan i totolay.”—The New York Times, Mayo 1, 2023.

 Masingattam ta pappasa na tiempo nu pammakapianan onu makadaral i AI. Anni i kagian na Biblia?

 Ipasingan na Biblia nu ngatta ari tu siguradu nga pammakapianattam i pangusa na totolay ta teknolohia.

1.  1. Maski nu makasta i motibo na totolay, ariadda masingan i negatibo nga resulta na kukukuadda.

   •   “Egga i dalan nga gitta na fustu ta tadday nga tolay, ngem patay balo i pattuppalan natun.”—Proverbio 14:12.

2.  2. Ari makontrol na tadday nga tolay i pangusa na tanakuan ta inimbento na.

   •   “Panawakku laman [i nagafuanakku] ta manali niakan. Sinni i makannammu nu mabbalin yayya tu masirib onu ari? Ngem, yayya ngana i manangngal ta ngamin nga nangusakku tu sikan anna ka-uto ku ta gukag na bilag.”—Eclesiastes 2:18, 19.

 Ipasingan natun nu ngatta kawagattam i pangigiya na Namaratu nittam.

 Nipromesa na Namaratu nittam nga ari na ipamavulun nga madaral i davvun onu i maddian tatun megafu ta totolay onu ta teknolohia nga pinadday da.

•   “Mattalupaddian tu mannanayun i davvun.”—Eclesiastes 1:4.

•   “I matunung ira ay irensiad-da i davvun, anna maddian ira taw tu mannanayun.”—Salmo 37:29.

 Usan na Namaratu nittam i Biblia tapenu igiya ittam ta memammo anna makasta nga mappange. Tapenu mammuan i aru paga ta kagian na Biblia, bibbigan i artikulo ira nga “Egga Kari i Mapammakatalakkan nga Giya ta Makasta nga Mappange?” anna “Makakaasa Ka sa Isang Magandang Kinabukasan.”