Marake i efekto na sobra nga pavvuru-vurung ta gawa-gawayyan anna ta emosiommu. Nu sobra i avvuru-vurummu, mammungan laman i problemam.

•  Ari ka kuruga maggiraw, mabbibbig, onu magginna ta negatibo nga balita. Ari nga mawag tu ammum i ngamin nga detalye na tadday nga problema nga mesissimmu. Nu puru negatibo nga balita i maginnam, mas mabi ka laman nga maganassing anna mawanan tu iddanama.

   Prinsipio na Biblia: “I nadammakkan nga espiritu ay makofu ta sikan na tadday.”​—Proverbio 17:22.

   “Maka-adik i kanayun nga ma-check tu bagu anna kakkadda-kaddag ira nga balita, ngem ari tu makasta i kunnatun. Napansikku nga nu ari ngà kuruga mabbibbig tu negatibo nga balita, ari ngà gapa kuruga mavuru-vurung.”​—John.

   Nonopammu: Talaga kari nga mawag tu kanayukka nga updated ta balita ira?

•  Egga nakuan i rutinam. Ikagumammu nga para-parehu i tiempo na pallukag mu, pakkakan, pagangngua tu trabahu ta balay, anna pakkatrug mu. Nu egga gare i iskediul mu, matageno mu nga normal i pattolem anna ari ka kuruga mavuru-vurung.

   Prinsipio na Biblia: “I plano ira na matalikarag ay siguradu nga makasta i pattuppalan na.”​—Proverbio 21:5.

   “Turi ta namegafu i COVID-19 pandemic, nadaral i rutinà. Ya’ ’la kuakku i marrelaks yatutta nofu i tiempò ta gannug ira nga ari mabba kuruga importante. Kayà ku nga masulit i oras ku yayya nga niyiskediul ku i mawag ira nga kuakku ta kada aggaw.”​—Joseph.

   Nonopammu: Egga kari i rutinam ta kada aggaw tapenu matageno mu nga egga i makasta nga netuppal mu?

•  Maffokus ta positibo ira nga gannug. Nu agga-nono mu i gannug ira ta nappasa nga tanakuan nakuan i pinagangnguam anna i posible ira nga marake nga mesimmu ta mappange, mas mavurukka laman. Mannono ka lallagu tu dua onu tallu nga gannug nga ipappabalo mu.

   Prinsipio na Biblia: ‘Mabbala-balo kamu kanayun.’—Colosas 3:15.

   “Nu mabbibbig ngà tu Biblia, puru positibo laman nga gannug i manono ku. Baka kagiammu tu sissimple laman yatun. Ngem dakal i meyuffun na!”—Lisa.

   Nonopammu: Makattamammu ngana kari i positibo ira nga mesissimmu ta pattolem megafu ta agga-nono mu i negatibo ira nga mesissimmu?

•  Nonopammu i pammakapian na tanakuan. Nu sobra i pavvuru-vurummu, baka isisinam i baggim ta tanakuan. Ngem mas makasta nu nonopammu nu kunnasim nga moffunan danuri magawag.

   Prinsipio na Biblia: “Arian nu nga nonopan i pammakapian nu laggapa, nu ari i pammakapian na kataggi-tadday nikamu.”​—Filipos 2:4.

   “Magayayya ngà nu uffunakku i tanakuan. Siempre, magayayya gapa yari uffunakku ira, tapus mapakarianan paga i pavvuru-vurukku. Awan paga lagu ngana tu tiempò tapenu mavvurung.”​—Maria.

   Nonopammu: Sinni ta kakilalam ira i magawag tu uffun anna kunnasim ira nga moffunan?

•  Immugurammu i gawa-gawayyammu. Magexercise ka anna makkatrug tu mapia. Kumakka gapa tu masustansia. Nu immugurammu i gawa-gawayyammu, mas positibo i pagimamma mu ta pattolay anna ari ka kuruga mavurung.

   Prinsipio na Biblia: “I kasossonna na kalla-kallo ay egga i mapia nga iyawa na.”​—1 Timoteo 4:8.

   “Kayà mi nakuan na ana ku nga kanayun nga magexercise ta lawan. Ngem ari ngana nga puede. Yari tu niyiskediul mi ngana laman nga magexercise ta unag na balemi. Megafu tatun, nakkasta i annagenappammi anna makkasundu kami na ana ku.”​—Catherine.

   Nonopammu: Egga kari i mawag tu uliammu ta kana-kanammu? Mawag kari gapa nga mas magexercise ka tapenu mas magawa-gawayyakka?

 Napakarianan i pavvuru-vurung na karuan turi ta kingngua da yatun ira nga tips. Aru gapa nga totolay i noffunan turi ta nammuadda i mapattalakkan ira nga promesa na Biblia meyannung ta makasta nga mappange. Innan i artikulo nga “Anni i Kuan na Pappatulan na Dios?”