SIGGA-SIFU KAMU!
Grabe nga Pakkurang tu Makan ta Interu Mundo nga Resulta na Gerra Anna Climate Change—Anni i Kagian na Biblia?
I gerra ta Ukraine, anna i efekto ira na climate change, limitan na i suplay na makan ta interu mundo mas ngana ta lugar ira nu sitaw mariga i makala tu makalanno nga makan.
“Malimitan i produksion anna kapeggan na makan megafu ta gulu, climate change, pangngina na kuryente anna karuan paga.”—António Guterres, UN secretary-general, Hulio 17, 2023.
“Megafu ta ari ngana nga parte na grain export agreement i Russia, kinagi na eksperto ira nga mas maggrabe i pakkurang tu makan anna mas mangngina i makan ta nasion ira nga baddi i sueldu da, mas ngana ta North Africa anna ta Middle East.”—Atalayar.com, Hulio 23, 2023.
Ammuan i kagian na Biblia meyannung ta pakkukurang tu makan anna i makasta nga mappange.
Dati ngana nga nakagi ta Biblia i pakkukurang tu makan
Dati ngana nga kinagi ni Jesus: “Maggegerra noka i nasa-nasion, kunne na gapa ta pappatulan ira. Ay mabbisin i totolay.”—Mateo 24:7.
Mabibbig ta libru na Biblia nga Nepakannammu i appa nga nakakabayu. Tadday tatun ira nga nakakabayu i mangirepresenta ta gerra. I tumunug gapa ta nisa ay mangirepresenta ta bisin, i tiempo nga mariga nga makala tu makan anna sobra ngina na maka-makan. “Nasingak-ku i tadday nga kabayu nga ngisi, anna egga i agga-takay nga nanammi ta akkilowan. Ay naginnà i kagitta na ngaral . . . nga kun-na nga nakkagi, ‘Tanga-tappang nga trigu i kegatangan na taddan ta tangaggaw, anna tallu tappang gapa nga bagga i kegatangan na taddan ta tangaggaw.’”—Nepakannammu 6:5, 6.
I dati ngana ira nga nakagi ta Biblia meyannung ta pakkukurang tu makan ay matuttuppal ngana sangawe ta tiempo tam nga agalan na Biblia tu “pangurianan ira nga aggaw.” (2 Timoteo 3:1) Tapenu mammuan paga i meyannung “ta pangurianan ira nga aggaw” anna i appa nga nakakabayu ta Nepakannammu, girawan i video nga Dakal i Nangulian na Mundo Namegafu Turi 1914 anna bibbigan i artikulo nga “I Appa nga Nakakabayu—Sinni Ira?”
Nu kunnasi makoffun i Biblia
Mabibbig ta Biblia i makoffun ira nga tabarang tapenu ammu tam i kuattam ta mariga ira nga situasion, kagitta na nu mangngina ira i maka-makan onu nu makkukurang i makan. Innan i karuan nga tips ta artikulo nga “Anni i Kuammu nu Baddi Ngana Laman i Kuartum?”
Mabibbig gapa ta Biblia i iddanama nga makkasta gabbalaman saw i situasion. Nipromesa natun nga duttal saw i tiempo nga ‘aru i magatab [onu, maapit] ta koman ira’ anna bastante ngana saw i makan para ta ngamin. (Salmo 72:16) Tapenu mas aru i mammuammu meyannung ta iddanama para ta mappange nga mabibbig ta Biblia anna nu ngatta makapattalo ka tatun, bibbigan i artikulo nga “Makakaasa Ka sa Isang Magandang Kinabukasan.”