Ta vulan na Hulio 2022, napakaru i grabe nga krimen ta interu mundo megafu ta pamalattug:

•   “Napalattugan i sikat nga pulitiko ta Japan [i dati nga Prime Minister nga si Shinzo Abe] yatutta nakaddagan i interu nga nasion kunne na gapa i interu mundo, jebi ta awan kuruga tu grabe nga krimen tatun nga nasion anna istrikto i regulasion na gobiernu meyannung ta pangusa tu palattug.”​—Hulio 10, 2022, The Japan Times.

•   “Nasion na Denmark, nanassingan ta pamalattug na tadday nga lalaki nga namatay tu tallu ta shopping mall ta Copenhagen.”​—Hulio 4, 2022, Reuters.

•   “South Africa: 15 i natay ta pamalattug na grupo na lallaki ta bar ta ili na Soweto.”​—Hulio 10, 2022, The Guardian.

•   Maturu tu 220 i natay ta pamalattug ta interu nga nasion na U.S. nige na Hulio 4 nga holiday.”​—Hulio 5, 2022, CBS News.

 Egga paga kari i pag-asa nga awan ngana saw tu mesimmu nga kuddanatun nga krimen? Anni i kagian na Biblia?

 Kagian na Biblia nga mattolay ittam ngana ta “pangurianan ira nga aggaw” nu sitaw kitapporay, brutal, anna awan tu allo na totolay. (2 Timoteo 3:1, 3) Megafu tatun, kanayun ngana laman nga maganassing i totolay. (Lucas 21:11) Ngem ipromesa na Biblia nga duttal saw i tiempo nga awan ngana tu grabe nga krimen anna ‘maddian noka i totolay ta memammo nga lugar, ta arayyu ta peligro ira nga paddianan anna ta ari matannug ira nga pagibannaggan.’ (Isaias 32:18) Kunnasi noka nga mesimmu yatun?

 Siguraduan noka na Dios nga awan ngana tu marake nga totolay anna daralan na i ngamin nga armas.

•   “Malsa noka ta davvun i marake ira.”​—Proverbio 2:22.

•   “Pagimmangan [na Dios] i gerra ira ta tanga-ravvunan; i pana anna pika ira ay en-na kata-kattuan, anna i kalatag ira ay en-na nga tuggian!”—Salmo 46:9.

 Tudduan na Dios i totolay nga mabbalin tu memammo tapenu ari ngana saw ira vuluvuga nga mangngua tu grabe nga krimen.

•   “Ariadda mangngua tu maski anni nga makapataki onu makadaral ta masanto nga vukig ku, megafu ta siguradu nga mapannu i davvun tu pakannammu kani Jehova kagitta na nekapannu na bebay tu danum.”​—Isaias 11:9.

•   Sangawe pagalaman, tuttudduan ngana na Dios i totolay ta interu mundo nga ari ngana vuluvuga mangngua tu grabe nga krimen, ni tu mangusa tu armas ira anna tudduan na ira nga “pabbalinadda i espada da tu taram na aradu anna i pika da tu paggapas.”​—Mikias 4:3.

 Tapenu mas aru i mammuammu meyannung ta promesa na Biblia nga awan ngana saw tu mamaganassing ta totolay, bibbigan i artikulo nga “Wala Nang Takot—Posible Kaya Ito?”

 Tapenu mas aru i mammuammu meyannung ta permanente nga solusion ta grabe ira nga krimen, bibbigan i artikulo nga “Kapayapaan sa Lupa sa Wakas!”