SIGGA-SIFU KAMU!
Grabe nga Pabbaha—Anni i Kagian na Biblia?
Ta interu mundo, aru nga totolay i mafektan na grabe nga pabbaha ira. Innan yaw ira nga report:
Ta nappasa ira nga aggaw, nesimmu i pinakamasikan nga uran ta capital city na China nga ari paga vuluvuga nga nesimmu ta unag na 140 nga dagun. Egga i 744.8 millimeters (29.3 inches) na uran namegafu ta Sabadu adde ta Mierkules.—AP News, Agosto 2, 2023.
“Turi ta Huebes ta mekadua nga aggaw na Typhoon Khanun, egga i masiki-sikan nga uran anna paddag ta southern Japan, megafu tatun egga i dua nga natay. . . . Ekspektan nga megafu ta bagiu magadde i uran tu 0.6 meters (2 feet) ta vuku-vukig na central Taiwan.”—Deutsche Welle, Agosto 3, 2023.
“I baha ta weekend [ta Nova Scotia] ay megafu ta pinakamasikan nga uran ta Atlantic Canada region nga ari paga vuluvuga nesimmu ta unag na 50 nga ragun.”—BBC News, Hulio 24, 2023.
Anni i kagian na Biblia ta kunnatun ira nga mesissimmu?
Seniales na “pangurianan ira nga aggaw”
Kagian na Biblia nga mattotolay ittam ngana ta tiempo nga magalan tu “pangurianan ira nga aggaw.” (2 Timoteo 3:1) Niprofesiya ni Jesus nga ta tiempo tam, makasingan ittam tu ‘kanninipang nga panakkilalan’ onu kappaganassing ira nga mesissimmu. (Lucas 21:11) Megafu ta panguli na klima mas kananassing anna mas aru i mesissimmu ira nga kalamidad, anna maruddu nga mas grabe yatun.
Egga i iddanama
Kagian na Biblia nga i kappaganassing ira nga mesissimmu i mangiyawa nittam tu iddanama. Ngatta? Kinagi ni Jesus: “Nu masingan nu tu mesimmu ngana danaw, ay ammu nu tu aranni ngana nga duttal i Pammaguray na Dios.”—Lucas 21:31; Mateo 24:3.
Ipasingan na mesissimmu ira nga aranni ngana nga solban na Pappatulan na Dios i problema ira ta davvun, kunne na gapa i siklo na danum.—Job 36:27, 28; Salmo 107:29.
Tapenu mammuan i mas aru paga nu kunnasi solban na Pappatulan na Dios i problema ira ta davvun, innan i artikulo nga “Sinni i Mamagimmang ta Kadaral na Planeta Tam?”