Nereport ta vulan na Hulio 2022 i pinakamapatu nga temperatura ta interu mundo:

•   “Taw nga vulan, namiddua nga inabisowan na ofisial ira ta China i totolay nga mafektan i ma-70 nga siudad ta pinakamapatu nga temperatura.”—Hulio 25, 2022, CNN Wire Service.

•   “Megafu ta nerumu-ruma nga patu ta Europe, natuggi i aru nga kakayyuan tatun.”—Hulio 17, 2022, The Guardian.

•   “Ta Liggu, nereport i pinakamapatu nga temperatura ta siudad ira ta United States, ta parte ta East Coast anna karuan nga parte na South anna Midwest.”—Hulio 24, 2022, The New York Times.

 Anni i ipasingan na mesissimmu? Madaral ngana kari i davvun anna ariattam mapaddianan? Anni i kagian na Biblia?

 Wan. I sobra nga patu ay metonos ta profesiya ira nga kagian na Biblia nga mesimmu ta tiempo tam. Angngarigan na, niprofesiya ni Jesus nga “kanninipang,” onu “nerumu-ruma anna kappaganassing ira nga ganna-gannug” i masingattam ira. (Lucas 21:11; Good News Translation) Megafu ta sobra nga patu ta interu mundo, ikassing na aru nga madaral i davvun megafu ta kukukuan na totolay ira.

 Ari tu kunnatun. Pinaratu na Dios i davvun tapenu permanente nga paddianan na totolay ira. (Salmo 115:16; Eclesiastes 1:4) Arian na ipamavulun nga daralan na totolay i davvun. Nipromesa na lallagu nga ‘daralan na i totolay nga namarattal toye ta utun na davvun ta panara-daral.’—Nepakannammu 11:18.

 Ikonsidera i dua nga profesiya nga mangipasingan paga ta promesa na Dios:

•   “Magayayya noka i tana-tana anna i mamaga nga davvun, ay mappalupagia noka i disierto anna mallappaw nga kagitta na safron.” (Isaias 35:1) Ari ipamavulun na Dios nga madaral i davvun. Pakappian na lallagu yatun.

•   “Tangngawam-mu i davvun gafu ta iyawa mu nga uran; mavvunga ta aru i davvun nga pinatabam.” (Salmo 65:9) Ta pamendision na Dios, mabbalin tu paraiso i davvun.

 Tapenu mammuan i aru paga nu kunnasi natuppal i profesiya na Biblia meyannung ta climate change, bibbigan i artikulo nga “Climate Change at ang Kinabukasan Natin—Ano ang Sinasabi ng Bibliya?”

 Tapenu mammuan paga i promesa na Biblia nu kunnasi metoli i makasta nga paddia-paddian na davvun, innan i artikulo nga “Sino ang Magliligtas sa Lupa?”