SIGGA-SIFU KAMU!
Grabe nga Tiempo na Maga—Anni i Kagian na Biblia?
“Nireport na China nga yaw nga dagun i pinaka-mapatu anna mekatallu ta pinaka-mamaga nga tiempo nga nerekord.”—The Guardian, Setiembre 7, 2022.
“Yaw ngana i mekalima nga dagun nu sitaw maka-ekspiriensa i karuan nga parte na Africa tu grabe nga tiempo na maga.”—UN News, Agosto 26, 2022.
“Posible nga maka-ekspiriensa tu tiempo na maga i maturu tu gaddua na Europe, anna awayya na tu yaw ngana i pinaka-grabe nga tiempo na maga nga nesimmu ta unag na 500 nga dagun.”—BBC News, Agosto 23, 2022.
Aru nga eksperto i nakkagi nga mattulu-tuloy paga i kunnatun ira nga tiempo na maga anna mas maggrabe paga. Makkasta kari paga i mappange? Anni i kagian na Biblia?
Tiempo na maga anna profesiya ta Biblia
Niprofesiya na Biblia ta kaggawattam:
‘Egga noka i bisin ta madduma-ruma nga lugar.’—Lucas 21:11.
Maruddu nga marresulta ta bisin i tiempo na maga. Matuppal i profesiya ira ta Biblia megafu ta ziga anna patay nga resulta na bisin.—Nepakannammu 6:6, 8.
Nu ngatta mas maggrabe i tiempo na maga
Kagian na Biblia i pinakarason nu ngatta mas maggrabe i tiempo na maga. Kagian na:
“Ari nga mawayya na tolay nga lumalakag nga itunung maski i dakkua na.”—Jeremias 10:23.
Kayà kagian natun nga ‘ari nga awayya na totolay nga itunung i dakkua da,’ onu immagurayan i baggi da. Maruddu nga marresulta ta tiempo na maga anna pakkurang ta suplay ira nga danum i marake nga desisiodda.
Umanugu i aru nga sientista nga marresulta tu global warming i kukukuan na totolay, tapus marresulta gapa yatun tu mas grabe nga tiempo na maga ta interu mundo.
I kukukuan na kakkam ira nga totolay anna i totolay ira nga mamadday tu polisiya nga ari da nga nonopan i efekto natun ta mappange ay marresulta ta pakkalbu na vukig, polusion, anna ari mepangngo nga pangusa ta natural resources ira. Megafu paga tatun, awayya na nga mofu i suplay ira na danum.
Ngem mangiyawa tu iddanama i Biblia.
Makkasta kari paga i mappange?
Nipromesa na Biblia nga solban noka na Dios i pakkukurang ta suplay na danum. Kunnasi?
1. Daralan noka na Dios i “totolay nga namarattal toye ta utun na davvun ta panara-daral!” (Nepakannammu 11:18) Alsan na noka i kegafuan na pakkukurang na suplay na danum kagitta na marake anna kakkam ira nga totolay nga makadaral ta pallevu i kukukuadda.—2 Timoteo 3:1, 2.
2. “Mabbalin i davvun nga mamaga tu weg nga aru i mula na.” (Isaias 35:1, 6, 7) Alsan noka na Dios i marake nga resulta na tiempo na maga anna pabbalinan na i davvun tu paraiso nga ari makkurang ta danum.
3. “Tangngawam-mu i davvun gafu ta iyawa mu nga uran; mavvunga ta aru i davvun nga pinatabam.” (Salmo 65:9) Megafu ta bendision na Dios, abundansia noka i masingngo nga makan anna marenu nga danum ta davvun.