Surasak Suwanmake/Moment via Getty Images
SIGGA-SIFU KAMU!
Heat Wave ta Interu Mundo ta Summer na 2023—Anni i Kagian na Biblia?
Attamman na totolay ta interu mundo i pinakamapatu nga tiempo nga nerekord anna i tanakuan paga ira nga kalamidad nga resulta natun. Innan i tumunug ira nga report:
“Ta 174 nga dagun nga parrekord na totolay ta temperatura ta interu mundo, yaw ngana i pinakamapatu nga vulan na Hunio nga nerekord.”—National Oceanic and Atmospheric Administration, U.S. Department of Commerce, Hulio 13, 2023.
“Maddaggun i grabe nga heatwave ta Italy, Spain, France, Germany anna Poland anna ekspektan nga magadde ta 48°C [118°F] i temperatura ta isla na Sicily anna Sardinia. Awayya na tu yaw ngana i pinakamapatu nga temperatura nga merekord ta Europe.”—European Space Agency, Hulio 13, 2023.
“Durante nga mas mappatu i mundo tam, ekspektattam nga mas maggrabe, mas umaru, mas massikan i uran ira nga marresulta ta grabe nga baha.”—Stefan Uhlenbrook, director of hydrology, water and cryosphere at the World Meteorological Organization, Hulio 17, 2023.
Mavuru-vurung ka kari megafu ta umara-aru i report meyannung ta paggrabe na paniempo? Ammuan i kagian na Biblia meyannung taw nga importante nga topiko.
Ketuppalan kari na profesiya na Biblia i grabe nga paniempo?
Wan. Ketuppalan na profesiya na Biblia i heat wave ta interu mundo anna i grabe nga paniempo nga mesissimmu sangawe. Angngarigan na, niprofesiya ni Jesus nga makasingan ittam tu “kanninipang,” onu “makapabbaw anna kananassing ira nga gannug.” (Lucas 21:11; Good News Translation) Megafu ta mas mappatu i temperatura ta interu mundo, ikassing na aru nga totolay nga ari ngana noka mapaddianan i davvun.
Ari ngana kari noka mapaddianan i davvun?
Mapaddianan lagapa. Pinaratu gare na Dios i davvun tapenu mabbalin tu permanente nga paddianattam; arian na ipamavulun nga daralan yatun na totolay. (Salmo 115:16; Eclesiastes 1:4) Nipromesa na paga lagu i tiempo nga “panaral [na] ta totolay nga namarattal toye ta utun na davvun ta panara-daral!”—Nepakannammu 11:18.
Mabibbig ta Biblia nga egga i pakawayya na Dios nga protektan i davvun ta natural ira nga kalamidad.
“Pinagimmang na [Dios] i bagiu nga masikan, ay nagimammo i palung ira nga darakal.” (Salmo 107:29) Egga i pakawayya na Dios nga kontrolan i paniempo. Awayya na nga solban i marake nga paniempo nga mamazziga ta totolay sangawe.
“Tangngawam-mu i davvun gafu ta iyawa mu nga uran; mavvunga ta aru i davvun nga pinatabam.” (Salmo 65:9) Ta uffun na Dios, mabbalin noka i davvun tu paraiso.
Tapenu mammuan i mas aru paga ta promesa na Biblia meyannung ta pamakasta uli ta davvun, bibbigan i artikulo nga “Sinni i Mamagimmang ta Kadaral na Planeta Tam?”