Kagitta na nasingattam ta gerra ta Ukraine, suportan na aru nga lider na Cristiano i gerra. Innan nu kunnasi suportan na lider na relihion i makkalaban nga nasion:

•   “Dakal i pappabalo mi anna pangidayaw mi ta ngamin nga mangidefensa ta nasiottam nga Ukraine ta mangatake tatun . . . Kanayun nga agga-nono, ipaki-pakimallo anna suportammi sikamu.”​—Metropolitan Epiphanius I na Kyiv, nga nereport ta The Jerusalem Post, Marso 16, 2022.

•   “Nirolluan na lider na Russian Orthodox Church i misa para ta suddalu ira nga Russian ta Liggu, nu sitaw pinagaram na ira nga idefensa i nasiodda ‘megafu ta i Russian laman i makangngua tatun.’ Tulu-tuloy paga i military campaign na Moscow kontra ta Ukraine.”​—Reuters, Abril 3, 2022.

 Mepangngo kari nga makiparte i Cristiano ira ta gerra? Anni i kagian na Biblia?

 Ituddu na Biblia nga ari makiparte ta gerra i kurug nga tagatuttul ni Jesu-Cristo.

•   “Ituku mu uli i espadam; ta ngamin i mangiyusa ta espada ay matay gabbalaman ta espada.”​—Mateo 26:52.

   Talaga kari nga tuttulan na tadday i kinagi ni Jesus nu makiggerra anna suportan na mabba i gerra?

•   “Ay sangoye, iyawa ku nikamu i bagu nga dob: makka-aya-aya kamu. Nu kunnasi na pangaya ku nikamu, mawag tu kunnatun gapa i pakka-aya-aya nu. Nu egga nikamu i pakka-aya-aya, kannammuan ngamin na totolay tu disipulo takamu.”​—Juan 13:34, 35.

   Ipasingan kari na tadday i aya nga kinagi ni Jesus nga panakkilalan na disipulo onu tagatuttul na nu suportan na i gerra?

 Tapenu mammuan i mas aru paga, bibbigan i artikulo nga “Dapat Bang Sumali sa Digmaan ang mga Kristiyano?”

 Rasonable kari para ta Cristiano ira i ari makiparte ta gerra sangawe? Wan. Niprofesiya na Biblia nga ta kaggawattam “ta ultimu nga parte na aggaggaw,” aru nga totolay ta nasion ira i ari ngana ‘maggigiammu tu pakiggerra,’ kagitta na nituddu ni Jesus.​—Isaias 2:2, 4.

•   Tapenu ammuan i aru paga, bibbigan i serye na artikulo nga “Ano ang Tingin ng Diyos sa mga Digmaan?” ta Ang Bantayan.

 Aranni ngana nga usan na ‘Dios na imammo’ nga si Jehova a i nelangitan nga gobiernu na tapenu kuragan i totolay na ta “kadara-darum anna katazza-tazzi.”​—Filipos 4:9; Salmo 72:14.

•   Tapenu mammuan nu kunnasi na kuan yatun, girawan i video nga Anni i Pappatulan na Dios?