I Mala Mu ta Pinassakrifisio ni Jesus
Mittan kada ragun, mattaradday ta interu mundo i Saksi ira ni Jehova anna i minillion nga inimbita da tapenu iselebra i Memorial na patay ni Jesus bilang panuttul ta bilin na. (Lucas 22:19) Makoffun yaw nga okasion tapenu masingattam i importansia na pangiyawa ni Jesus ta inango na para ta totolay. Masingattam gapa nu kunnasi afektan na sakrifisio na i pattoletam sangawe anna ta mappange.—Juan 3:16.
Nu naka-atende ka onu ari ta Memorial taw nga dagun, kunnasi ka mabenefisiowan ta pinassakrifisio ni Jesus ta inango na? Egga i dua nga importante nga gannug nga nituddu ni Jesus nga mawag tam nga kuan:
1. Gigiammuan i meyannung ta Dios anna kani Jesus. Nipakimallo ni Jesus ta nelangitan nga Yama na: “Ay yaw i inango nga adde ta ngangangay: i pakannammu da tu sikaw i tattadday nga kurug nga Dios, anna i pakannammu da gapa kani Jesu-Cristo nga zinog mu.”—Juan 17:3.
2. Kuammu i nagigiammum. Nipasigo ni Jesus nga mawag tam iyaplika ta pattoletam i tuttuddu na ira. Angngarigan na, ta Sermon ta Vukig ni Jesus, kinomendan na i sinni laman nga ‘magginna anna mamarulo ta kagian na.’ (Lucas 6:46-48) Kinagi na paga ta tanakuan nga okasion: “Sangoye ta ammu nu ngana ngamin danaw, mapalag kamu nu kuan nu ira.”—Juan 13:17.
Ikaya mu kari tu mas aru mammuammu meyannung ta Dios anna kani Jesus? Ikaya mu kari i praktikal nga tabarang nu kunnasim meyaplika i nagigiammum? Yaw i karuan ira nga makoffun nikaw.
Paggigiammu tu Biblia
Nakoffun i libre nga paggigiammu tu Biblia ta aru nga totolay nga mammuan i tuttuddu na Biblia anna niyaplika da yatun ta pattoleda.
Innan i pahina nga Paggigiammu tu Biblia nga Egga i Manguffun Nikaw tapenu mammuan paga i meyannung taw.
Girawan i video nga Magayayya Ka ta Paggigiammum tu Biblia tapenu masingammu nu kunnasi i paggigiammu tu Biblia kavulu i Saksi ira ni Jehova.
Study na Saksi ira ni Jehova
Mamiddua kada ligguan nga mattaradday i Saksi ira ni Jehova ta lugar nga paddayarayawadda nga magalan tu Kingdom Hall. Taw ira nga study, paguruvovugadda i Biblia anna nu kunnasi nga meyaplika i tuttuddu na ira ta pattoleda.
Awayya na magatende na maski sinni taw ira nga study; ariammu kawagan nga mabbalin tu Saksi tapenu maka-atende. Depende ta situasion ta lugar nu, awayyam magatende ta face-to-face onu gukaban na videoconference.
Girawan i video nga Anni Kukukuadda ta Kingdom Hall? tapenu mammuammu i ekspektammu taw ira nga study.
Magaleg tu lokasion na study nga aranni nikaw ta pahina nga Study na Saksi ira ni Jehova.
Online nga artikulo anna video ira
Aru nga artikulo anna video ira taw nga website i makoffun nikaw nga mammuan i aru paga meyannung ta tuttuddu ni Jesus anna i balor na pinassakrifisio na ta inango na.
Angngarigan na, tapenu mammuan nu kunnasi mabenefisiowan i minillion nga totolay ta patay na tadday laman nga tolay, bibbigan i artikulo ira nga “Paano Nakapagliligtas si Jesus?” anna “Ngatta Nazziga-riga Anna Natay si Jesus?” onu girawan i video nga Ngatta Natay si Jesus?