SIGGA-SIFU KAMU!
Paddayaw ta Imahen Ira—Anni i Kagian na Biblia?
Segun ta Catholic News Service, ta tadday nga seremonia ta St. Peter’s Basilica turi ta Marso 25, 2022, siminaddag si Pope Francis ta arubang na rebulto ni Maria nga “agga-kiddam i mata na anna agga-dukag tapenu silensio nga makimallo.” Tatun ay “nakimemallo yayya kani Maria” para ta imammo. Niyammung gapa na tadday nga Vatican News report nga “nipakimemallo na Pope Immaculate Heart of Mary nga bendisionan na i totolay, jebi danuri maddian ta Russia anna Ukraine.”
Anni i makagim? Mepangngo kari nga maddasal ta imahen ira onu usan danatun ta paddayaw? Pannonopan i tumunug ira nga teksto ta Biblia:
“Ari ka mangngua para ta baggim tu inukit nga imahen onu tadday nga forma nga gitta na maski anni nga egga ta langi onu ta davvun onu ta dana-danum. Ari ka makkummag tatun ira onu matenta nga maddayaw tatun ira, megafu ta sakan si Jehova nga Dios mu, i Dios nga mangikiddaw tu interu-futu nga debosion.”—Exodo 20:4, 5. a
“I dios da ira ay nakua ta pira anna vulawan; danaw ay pinadday na tolay laman. Egga i simu da, ngem ari ira nga makapaguvovug; egga i mata da, ngem ari ira nga makasingan. Egga i talinga da, ngem ari ira nga makaginna; egga i igung da, ngem ari ira makagug mabba. Egga i lima da, ngem awan tu annagenappad-da; egga i takki da, ngem ari ira makalakag vuluvuga, ni anni nga guni i makua da ta karalong da. I namadday ta kuddanaw ay kagitta da laggapa, kunne ta ngamin nga mammakatalo nira.”—Salmo 115:4-8.
“Sakan si Jehova. Yatun i ngagakku; ariakku ibillay i glorià ta maski sinni, onu i dayò ta napadday ira nga imahen.”—Isaias 42:8, footnote.
“Ari kamu nga maddaya-rayaw ta sinan-dios.”—1 Corinto 10:14.
“Arayyuan nu i ari tu kurug ira nga dios!”—1 Juan 5:21.
Para ta mas aru nga informasion ta kakkagian na Biblia meyannung ta pangusa tu imahen ira ta paddayaw, bibbigan i artikulo nga “Ang Pangmalas ng Bibliya—Mga Imahen” onu girawan i video nga Ikaya Kari na Dios nga Mangusa Ittam tu Imahen ta Paddayaw Tam?
Baka ikaya mu gapa nga mammuan i kakkagian na Biblia meyannung taw ira nga topiko:
“Birheng Maria—Ano ang Sinasabi ng Bibliya Tungkol sa Kaniya?”
“Mga Himala at Aparisyon—Tanda Buhat sa Diyos?”
Photo credit: Vincenzo Pinto/AFP via Getty Images
a Jehova i personal nga ngagan na Dios. (Salmo 83:18, NW) Innan i artikulo nga “Sinni si Jehova?”