Importante Paga Kari nu Anni i Kurug?
Mariga ngana nga makannammuan sangawe nu anni i kurug anna i ari tu kurug. Maruddu gare nga mabbase i totolay ta mataga-tageno da anna ta ammu da nga fustu imbes tu ta kurug. Ta interu mundo mangurug i totolay nga awan talaga tu kurug.
Ari tu bagu yatun. Ma-2,000 dagun ngana i nappasa, niyavu na Romano nga Gobernador nga si Poncio Pilato kani Jesus: “Anni i kurug?” (Juan 18:38) Ari ngana nga ininnaggan ni Pilato i tabbag ni Jesus, ngem importante lagapa yatun nga pakkiavu na. Mattolay ittam ta mundo nu sitaw maguluan i totolay nu anni talaga i kurug. Mangiyawa i Biblia tu tabbag nga makoffun ta nikaw tapenu mammuammu nu anni i kurug anna i ari tu kurug.
Egga kari talaga i kinakurug?
Wan. Usan na Biblia i uvovug nga “kurug” tapenu tukuyan i gannug ira nga nebase ta kinakurug anna mekunnay ta estandarte ta moral. Ituddu na Biblia nga si Jehova a nga Dios i Paggafuan na kinakurug. Nedeskriba yayya bilang “i Dios na kinakurug.” (Salmo 31:5, NW) Malegan ta Biblia i kinakurug nga naggafu ta Dios, anna nikumpara na yatun nga kinakurug ta nawag megafu ta megiya ittam natun ta kinakurug maski nu mattolay ittam ta magulu nga mundo.—Salmo 43:3; Juan 17:17.
Kunnasim nga mammuan i kinakurug?
Manaki na Dios nga basta akseptattam laman i kinakurug nga naggafu ta Biblia nga ari tam labbi pinannonopan. Ikaya na nga gigiammuattam yatun gukaban na abilidad tam nga marrason imbes nga maddepende laman ta emosiottam. (Roma 12:1) Ikaya na nga makilala tam anna ayatattam yayya gukaban na “interu nga nono” tam, anna ikaya na nga siguraduattam nga kurug i nagigiammu tam ta Biblia.—Mateo 22:37, 38; Kingngua 17:11.
Kunnasi namegafu i kinaladdug?
Kagian na Biblia nga namegafu i palladdug ta kalaban na Dios nga si Satanas nga Diablo. Nedeskriba yayya na Biblia bilang ‘yama na siri [onu, laddug].’ (Juan 8:44) Nakkagi yayya tu kinaladdug meyannung ta Dios ta ollu nga totolay. (Genesis 3:1-6, 13, 17-19; 5:5) Adde sangawe, iwara-wara lagapa ni Satanas i kinaladdug anna ililimag na lagapa i kinakurug meyannung ta Dios.—Nepakannammu 12:9.
Ngatta normal ngana laman i palladdug sangawe?
Ta kaggawattam nga agalan na Biblia nga “pangurianan ira nga aggaw,” mas aru ngana i nainfluwensian ni Satanas. Maruddu nga malladdug i totolay tapenu melogo da i tanakuan anna mala da i ikaya da ta nira. (2 Timoteo 3:1, 13) Normal ngana laman gapa i kinaladdug maski ta aru nga relihion sangawe. Gitta na niprofesiya na Biblia ta tiempo tam, ‘magaleg i totolay tu aru nga mangituddu nira ta ganna-gannug nga pakkata-katallan na talinga da nga ginnan,’ anna “pallikurad-da noka ngana i kurug.”—2 Timoteo 4:3, 4.
Ngatta importante i kinakurug?
Mawag na totolay i kinakurug tapenu mattalo ira ta kataggi-tadday. Nu awan tu pattalo, madaral i pakkorofun anna ari nga mattaradday i totolay. Kagian na Biblia nga kayà na Dios nga nebase i paddayaw tam ta kinakurug. Kunna: “Danuri i maddaya-rayaw [ta Dios] ay maddaya-rayaw ta Espiritu anna kakurug.” (Juan 4:24) Makoffun i kinakurug ira ta Biblia tapenu mammuammu i falsu ira nga ituttuddu na relihion anna tapenu ari ka nga maimfluwensian natun. Kunnasi? Bibbigan i serye na artikulo nga “Bakit Nahihirapan ang Ilan na Mahalin ang Diyos?”
Ngatta kayà na Dios nga makannammuakku i kinakurug?
Ikaya na Dios nga mapaliag ka. Tapenu mesimmu yatun, mawag nga makannammuammu i kinakurug meyannung ta nisa. (1 Timoteo 2:4) Nu magigiammum i estandarte na Dios meyannung ta fustu anna ugal tapus mattolay ka segun ta estandarte na, mabbalikka tu madukko nga kofun na. (Salmo 15:1, 2) Tapenu uffunan i totolay nga makannammuan i kinakurug, zinog na Dios si Jesus ta davvun. Ikaya na Dios nga tuttulattam i tuttuddu ira ni Jesus.—Mateo 17:5; Juan 18:37.
Alsan kari noka na Dios i kinaladdug?
Wan. Ikalussaw na Dios nu malladdug i totolay tapenu laman mala i ikaya da. Nipromesa na nga alsan na noka danuri i minalladdug nga ariadda kayà i manguli. (Salmo 5:6) Sonu kuan yatun na Dios, ituppal na gapa i promesa na: “I bibig nga makkagi tu kinakurug ay mattalupaddian ta mannanayun.”—Proverbio 12:19.
a Jehova i personal nga ngagan na Dios. (Salmo 83:18) Innan i artikulo nga “Sinni si Jehova?”