“Mabbaling laman tu memammo i mundo tam nu irespeto tam i padduruma na kataggi-tadday.”—UNESCO Declaration of Principles on Tolerance, 1995.

 Marresulta gapa ta pallullussaw i ari nga pangirespeto ta padduruma na kataggi-tadday. Nu minallussaw i tadday, awayya na nga makapataki i kakkagian na, minangngireruma yayya, anna vayolente.

 Ngem madduruma i ideya na totolay meyannung ta pangirespeto ta padduruma na kataggi-tadday. Para ta karuan, mawag nga akseptammu i ngamin nga kukukuan na tanakuan. Mangurug gapa i karuan ta ituttuddu na Biblia nga mawag nga irespeto na tadday i kuru-kurugan na tanakuan maski paga ari yayya nga umanugu tatun.

 Makoffun kari i Biblia ta nittam tapenu mabbalittam tu minangngirespeto ta padduruma na kataggi-tadday ta nittam?

Prinsipio ta Biblia meyannung ta pangirespeto ta padduruma na kataggi-tadday

 Ituddu ta nittam na Biblia nga irespeto tam i padduruma na kataggi-tadday. Kagian na: “Ipasingan nu i sippo nu ta ngamin nga totolay.” (Filipos 4:5) Ipagaram nittam na Biblia nga mawag nga ikonsidera, irespeto, anna tratuattam tu patas i totolay. Maski nu ari ittam umanugu ta kukukuadda, irespeto tam lagapa i desisiodda.

 Ngem ituddu gapa na Biblia nga egga i estandarte na Dios meyannung ta kondukta na totolay. Kagian na: “Kinagi [na Dios] nikaw, O tolay, i mapia.” (Mikias 6:8) Mabibbig ta Biblia i giya na Dios nga makoffun ta totolay tapenu mabbalin tu magayayya i pattoleda.—Isaias 48:17, 18.

 Ari ittam niddan na Dios tu pakawayya nga husgan i tanakuan. Segun ta Biblia, “I Dios laman i nangiyawa ta Dob anna yaya gapa i hues . . . Sinni ka kari nga mamanunnu ta ikattolem?” (Santiago 4:12) Niddan na Dios i kada tadday nittam tu lallaguray nga mappili anna sittam lagapa i tubbag ta resulta natun.—Deuteronomio 30:19.

I kagian na Biblia meyannung ta pangirespeto

 Kagian na Biblia nga mawag tu “ikakua [tam] ngamin i totolay.” (1 Pedro 2:17) Nu kayà tam gafu nga tumuttul ta Biblia, irespeto tam i ngamin nga totolay maski nu anni i kuru-kurugadda onu i kayà da nga kuan ta pattoleda. (Lucas 6:31) Ari na kayà kagian nga mawag tu umanugu ittam ta ngamin nga kuru-kurugadda onu opiniodda onu suportattam i ngamin nga desisiodda. Ari tam gapa ira nga kokkontran, nu ari, kuattam i ngamin tapenu parigan i pinattratu ni Jesus ta tanakuan.

 Angngarigan na, egga i nakibbida ni Jesus nga babay nga tanakuan i kuru-kurugan na nga relihion. Egga gapa i katadday natun nga babay tu lalaki nga ari na atawa. Ari nga umanugu si Jesus ta kunnatun nga annangngua, ngem marespeto na lapa nga kinibbida i babay.—Juan 4:9, 17-24.

 Kagitta ni Jesus, sigga-paran anna marespeto i Cristiano ira nga ipakanawag i kuru-kurugadda ta maya ira nga magginna. (1 Pedro 3:15) Ituttuddu na Biblia ta Cristiano ira nga ariadda nakuan nga ipilit ta tanakuan i opiniodda. Kagian na paga nga i tagatuttul ni Cristo ay “mawag tu ari nga makiddama . . . , masippo anna mapia i akkivvulu-vulu na ta ngamin,” nelavu danuri tanakuan i kuru-kurugadda.—2 Timoteo 2:24.

I kagian na Biblia meyannung ta pangikalussaw

 Kagian na Biblia nga “[kuattam] i adde na awayya [tam] nga makipammapia ta ngamin nga totolay.” (Hebreo 12:14) Lillitattam gafu i pallullussaw. Mappursigi ittam nga mabbalin tu memammo i relasiottam ta tanakuan, ngem ari tam gapa nga ikompromiso i estandarte ira nga tuttuttulattam. (Mateo 5:9) Kakurugan na, ipagaram na Biblia ta Cristiano ira nga ayatadda i kumokkontra nira gukaban na makasta nga pattratu da ta nira.—Mateo 5:44.

 Kurug gapa nga kagian na Biblia nga “ikalussaw” na Dios i annangngua ira nga mangipepasiran onu makataki ta tanakuan. (Proverbio 6:16-19) Ngem niyusa taw na Biblia i uvovug nga “ikalussaw” tapenu ipakanawag nga talaga manaki na i marake ira nga annangngua. Ipasingan gapa na Biblia nga kakayà na Dios nga pakoman anna uffunan i totolay nga maya manguli anna tumuttul ta estandarte na ira.—Isaias 55:7.

Teksto ira ta Biblia nga konektadu ta pangirespeto ta padduruma na kataggi-tadday

 Tito 3:2: “Kagiam-mu tu . . . massissippo anna minangngikakua ira ta ngamin nga totolay.”

 Mateo 7:12: “Kuan nu gafu ta ikattolay nu i ikaya nu nga kuad-da nikamu.”

 Josue 24:15: “Pilian nu gafu sangawe nu sinni i passerbian nu.”

 Kingngua 10:34: “Arian [na Dios] nga padduma-ruman i pangikakua na ta totolay.”

 Habakuk 1:12, 13: “O Jehova a . . . , ariammu pagurayan i kinadake.”

 Roma 12:19: “Pagurayan nu tu i poray na Dios i mangibalo. Ta kagian na Masanto nga Tura, ‘I pangibalo ay egga niakan. Sakan noka i mangibalo, kun-na Yafu.’”

 Ari nga niyawa ni Jehova nga Dios ta sinni laman i pangibalo. Siguraduan na nga mala tam i hustisia ta mepangngo nga tiempo. Tapenu aru paga i mammuammu, bibbigammu i artikulo nga “Makakamit Pa Ba Natin ang Katarungan?”