Anni i Kagian na Biblia Meyannung ta Krisis ta Danum ta Interu Mundo?
Mawag tam ngamin i marenu nga danum tapenu matolay. Ngem “megafu ta umara-aru i pakawagan tu danum ta interu mundo, meparubang ittam ta grabe nga krisis ta danum,” segun kani UN Secretary General António Guterres. Binillion nga totolay ta interu mundo i awan ngana tu pangapadda tu marenu nga danum nga puede menum.
Strdel/AFP via Getty Images
Duttal kari i tiempo nga bastante ngana i danum para ta ngamin? Onu ari ngana mawawan i krisis ta danum? Anni i kagian na Biblia?
Nu anni i promesa na Biblia meyannung ta suplay na danum
Kagian na Biblia nga awan ngana noka tu pakkurang tu danum. Kakurugan na, abundansia noka i marenu nga danum.
‘Luttuag i danum ta tana-tana, anna magagi i weg ta disierto. Mabbalin tu weg nga aru i mula na i mamaga nga davvun, anna egga noka i annì ta mamaga nga davvun.’—Isaias 35:6, 7.
Ngatta kurugattam yatun nga promesa na Biblia? Ikonsidera i kagian na Biblia meyannung ta tadday nga detalye nu kunnasi nga nadisenio i planeta nga paddianattam.
Nu anni i kagian na Biblia meyannung ta davvun anna ta siklo na danum
‘Ari nga pinaratu na Dios i davvun nga awan tu sesserbi na, ngem kiningngua na yaw tapenu paddianan.’—Isaias 45:18.
Pinaratu na Dios i davvun nga egga ngana ngamin tatun i kawagan tapenu matolay. Kagitta na, egga i natural nga sistema ira tatun nga makeyawa tu abundansia nga marenu nga danum.
‘Unnugan na Dios i turu na danum pa-utun; mabbuu yatun tu kunam anna mabbalin tu urang; ivuru yatun na kunam; anna moranan i ngamin nga totolay.’—Job 36:27, 28.
Kayà kagian natun nga dinisenio na Dios i davvun nga mawayya na iresiklo i danum anna ari momofu i suplay natun. Umallag onu umassug i danum nga naggafu ta davvun anna ta bebay, mabbuu yatun tu kunam, anna mabbalin tu urang nga mangiyawa tu tulu-tuloy nga suplay na marenu nga danum para ta totolay anna aya-ayam.—Eclesiastes 1:7; Amos 5:8.
“Mangiyawa ngà tu urang ta fustu nga tiempo, anna mangiyawa i davvun tu apit na, anna mavvunga i kakayu ira ta tana.”—Levitico 26:4.
Nipromesa na Dios nga bendisionan na i kusetcheru nga Israelita ira tagga tu aru nga apit gukaban na pangiyawa ta nira tu tulu-tuloy nga suplay na danum. Ammu na nga aru i magatab nu egga i makalanno nga urang ta eksakto nga tiempo.
Nu kunnatun i kingngua na Dios ta Israelita ira tagga, kunnatun gapa noka i kuanna ta interu davvun. (Isaias 30:23) Ngem ta maddaggun ta aru nga parte na mundo, makkrisis ngana ta danum, anna tadday laman nga rason i kawan na urang. Anni paga i ituttuddu na Biblia meyannung ta solusion ta problema ta danum?
Nu kunnasi nga mangultimu i krisis ta danum
Kagian na Biblia nga solban na Pappatulan na Dios i problema nga makafekto ta davvun, nelagum tatun i krisis ta danum. (Mateo 6:9, 10) I Pappatulan na Dios ay tadday nga gobiernu ta langi nga mammaguray noka ta interu davvun. (Daniel 2:44; Nepakannammu 11:15) Pawanan na Pappatulan na Dios i makagafu ta krisis ta danum, gannug nga ari makua na gobiernu na tolay.
Problema: I climate change ay tadday nga rason nu ngatta ari balanse i siklo na danum. Marresulta yatun tu sobra nga pammaga na davvun onu grabe nga pabbaha megafu ta sobra nga paguran onu paddakal na danum ta bebay.
Solusion: Pakappian na Pappatulan na Dios i ngamin nga nadaral ta davvun tapenu makkasta uli yatun. Nipromesa na Dios: “Talibaguak-ku sangoye ngamin i ganna-gannug!” (Nepakannammu 21:5) Abundansia noka i marenu nga danum ta mamaga ira nga davvun. Megafu tatun, matolay i mulu-mula maski ta lugar ira nga ari puede nga paddianan sangawe. (Isaias 41:17-20) Gukaban na Pappatulan na Dios, kontrolan noka ni Jesu-Cristo i fuersa ira ta davvun.
Ta kegga ni Jesus ta davvun, nipasingan na i pakapangngua nga niyawa sa na Dios turi ta pinagimmanna i masiki-sikan nga bagiu. (Marcos 4:39, 41) Ta pammaguray ni Cristo bilang Patul ta Pappatulan na Dios, awan ngana noka tu kalamidad. Magayayya noka i totolay ira megafu ta kurug nga imammo anna seguridad ta awan ngana tu kalamidad nga mamavvurung nira.
Problema: Mas nga makkurang i marenu nga danum megafu ta totolay ira nga awan tu pakialam da ta tanakuan anna ta makasarili ira nga kompania nga mamaddaping ta bannag, weg, anna danum nga egga ta unag na davvun.
Solusion: Pakarenuan noka na Dios i planeta tam anna itoli na i makasta nga paddia-paddian na bannag, weg, bebay, anna davvun. Mabbalin noka tu paraiso i davvun. Makakkasta i kinagi na Biblia: “Magayayya noka i tana-tana anna i mamaga nga davvun, ay mappalupagia noka i disierto anna mallappaw nga kagitta na safron.”—Isaias 35:1.
Anni noka i mesimmu ta manaral ta pallevu onu turi ira ta awan tu pakialam da ta kasittoleda? Nipromesa na Dios nga ‘daralan na i totolay nga namarattal toye ta utun na davvun ta panara-daral!’—Nepakannammu 11:18; Proverbio 2:21, 22.
Problema: Ari sayangan na totolay i danum, anna i resulta na, aru nga danum i masayang anne ta mesuplay na planeta tam.
Solusion: Gukaban na Pappatulan, aranni ngana nga ‘makua i uray na Dios toye ta davvun’ ari tu i uray na makasarili ira nga totolay. (Mateo 6:9, 10) Iyawa noka na Pappatulan na Dios i kapianan nga edukasion ta totolay. “Siguradu nga mapannu i davvun tu pakannammu kani Jehova,” segun ta Isaias 11:9. a Megafu tatun nga kapianan nga pakannammu, monag nga aya ta Dios anna ta ngamin nga pinaratu na, matangngallan noka tu mapia na totolay ira i makakkasta nga planeta tam anna i gannug ira nga egga tatun.
Tapenu mammuan i mas aru paga meyannung ta kuan na Pappatulan na Dios, innan i artikulo nga “Anni i Kuan na Pappatulan na Dios?”
Bibbigan i libru na Isaias, kapitulo 35, tapenu makannammuammu nu kunnasi mabbalin tu paraiso i davvun.
Girawan i video nga Ngatta Pinaratu na Dios i Davvun? tapenu mammuan i mas aru paga meyannung ta gakkag na Dios ta davvun anna ta totolay ira.
a Jehova i personal nga ngagan na Dios. (Salmo 83:18). Innan i artikulo nga “Sinni si Jehova?”