Kada ragun, rinivu-rivu i mesimmu nga lunig. Magaru tatun ay makafi laman. Ngem marresulta i masisikan nga lunig ta aru nga kadaral, pazziga-riga, anna patay. Nu mittan, mat-tsunami megafu ta masisikan nga lunig, tapus daralan natun i lugar ira nga aranni ta bebay anna aru i matay. Dati ngana kari nga nakagi ta Biblia nga mesimmu i masisikan nga lunig?

Taw nga artikulo

•  Dati ngana kari nga nakagi ta Biblia i lunig ira?

•  Ketuppalan kari na dati nga nakagi ta Biblia i lunig ira sangawe?

•  Anni i kebalinan na para ta nittam na dati ngana nga nakagi ta Biblia meyannung ta lunig ira?

•  Mali ira nga pagabbo ta nakagi ta Biblia meyannung ta lunig ira

 Ta Biblia, dati ngana nga kinagi ni Jesus i meyannung ta lunig ira. Yaw ira i kinagi na nga mabibbig ta tallu nga libru na Biblia:

 “Maggegerra noka i nasa-nasion, kunne na gapa ta pappatulan ira. Ay mabbisin i totolay, anna mallunig ta madduma-ruma nga lugar.”—Mateo 24:7.

 “Maggegerra noka i nasa-nasion kunne na gapa ta pappatulan ira. Mallunig noka ta madduma-ruma nga lugar anna duttal i bisin.”​—Marcos 13:8.

 “Egga noka i masikan ira nga lunig, bisin anna palakag nga tulu-tulagan ta madduma-ruma nga lugar.”​—Lucas 21:11.

 Dati ngana nga kinagi ni Jesus nga egga i “masikan ira nga lunig” ta “madduma-ruma nga lugar” anna kagiddan natun nga mesimmu i gerra ira, bisin, anna tulu-tulagan. Nu maggiriddang nga mesimmu danatun, pakurugan laman natun nga mattotolay ittam ngana ta “panuppalan na mundo” onu “pangurianan ira nga aggaw.” (Mateo 24:3; 2 Timoteo 3:1) Base ta kronolohia na Biblia, namegafu i “pangurianan ira nga aggaw” turi ta 1914 anna ari paga nga nangultimu yatun.

 Wan. Sakto ta mesissimmu ira sangawe i dati ngana nga nakagi ni Jesus meyannung ta lunig ira. Namegafu paga turi ta 1914, egga ngana i maturu tu 1,950 nga masisikan nga lunig nga narresulta ta patay na maturu tu dua million nga totolay. a Yaw i karuan ta angngarigan.

 2004—Indian Ocean. Megafu ta magnitude 9.1 nga lunig, nat-tsunami tapus nakadde yatun ta aru nga nasion anna namatay tu 225,000 nga totolay.

 2008—China. Zinaral na magnitude 7.9 nga lunig i babario anna ili ira, anna natantia nga 90,000 i natay, 375,000 i na-injure, anna minillion i nawanan tu babalay.

 2010—Haiti. Megafu ta magnitude 7.0 anna i natturunug nga masisikan nga aftershock, maturu tu 300,000 i natay anna tadday nga million i nawanan tu babalay.

 2011—Japan. Megafu ta magnitude 9.0 anna ta tsunami ira, natantia nga 18,500 i natay anna rinivu-rivu gapa i fersadu nga nanaw ta gibbalayadda. Nadaral i Fukushima power plant yatutta nawwara i kappatay nga radiation maggafu tatun nga planta. Pappasa na mafulu dagun, ma-40,000 lagapa i ari paga nga nakatoli ta gibbalayadda nga aranni tatun nga planta megafu ta kontaminadu i pallevu ta delikadu ira nga radiation.

 Makoffun i dati ngana ira nga nakagi ta Biblia meyannung ta lunig ira tapenu mammuattam nu anni ngana i aranni nga mesimmu. Kinagi ni Jesus: “Nu masingan nu tu mesimmu ngana danaw, ay ammu nu tu aranni ngana nga duttal i Pammaguray na Dios.”​—Lucas 21:31.

 Iyesplika na Biblia nga i Pammaguray onu Pappatulan na Dios ay kuru-kurug nga gobiernu ta langi. Si Jesu-Cristo i Patul tatun. Yatun nga Pappatulan i nituddu ni Jesus nga ipakimallo na tagatuttul na ira.​—Mateo 6:10.

 Sonu Pappatulan na Dios ngana i mammaguray taw ta davvun, siguraduan na Dios nga awan ngana noka tu maski anni nga kalamidad, kagitta na lunig ira nga mamerwisiu ta totolay. (Isaias 32:18) Pawanan na ngana gapa noka ngamin nga marake nga nappasa-pasattam ta pisikal anna ta emosional megafu ta lunig ira. (Isaias 65:17; Nepakannammu 21:3, 4) Tapenu mas aru i mammuammu, bibbigan i artikulo nga “Anni i Kuan na Pappatulan na Dios?”