Umara-aru nga Totolay i Makatageno tu Pagitetadday—I Kagian na Biblia
Segun ta kababalin nga global report, a tadday ta kada appa nga totolay i makatageno tu pagitetadday.
“Mafektan na pagitetadday i maski sinni, maski anni nga edad, anna maski sitaw i dian na.”—Chido Mpemba, cochair of the World Health Organization’s Commission on Social Connection.
Abbo na karuan nga i mannakam laman ira onu i awan tu kavulu na i makatageno tu pagitetadday. Ngem maski danuri mabbing, magawa-gawayyan, makasta i paddia-paddiadda, anna egga atawa na ay makatageno gapa tu pagitetadday. I ari pakikavulu ta tanakuan anna pagitetadday ay talaga makafekto ta pisikal anna emosional.
“Ari laman tu basta marake nga panageno i pagitetadday,” kunni Dr. Vivek Murthy, U.S. surgeon general. Kunna paga: “I bilang na matay megafu ta pagitetadday ay kaparehu na bilang na matay nga resulta na passigariliu tu 15 nga stick na sigariliu kadaggaw.”
I kagian na Biblia
Ari ikaya na Namaratu tam nga magitetadday ittam. Gakkag na Dios nga ma-enjoy na totolay i makapagayayya nga pavvurulu.
Prinsipio na Biblia: “Kinagi [na] Dios: ‘Ari tu makasta para ta lalaki nga mattalupaddian nga tattadday.’”—Genesis 2:18.
Ikaya na Dios nga egga i makasta nga relasiottam nisa. Nipromesa na nga umaranni yayya nittam nu umaranni ittam nisa.—Santiago 4:8.
Prinsipio na Biblia: “Magayayya danuri sigga-nono ta espiritual nga kawagadda, ta kukua da i Pappatulan na langi.”—Mateo 5:3, NW.
Ikaya na Dios nga dayawattam yayya kavulu i tanakuan. Nu kunnatun i kuattam, mas magayayya ittam.
Prinsipio na Biblia: “Nonopat-tam nu kunnasi na pakka-uffu-uffut-tam nga mangipasingan ta aya anna pangngua ta mapia. Ariat-tam nga immangan i paggarammammung tam. . . . Makkapasa-pasikan ittam lallagu tu nono.”—Hebreo 10:24, 25.
Para ta mas aru paga nga informasion nu ngatta importante nga labanan i pakatageno tu pagitetadday, bibbigan i artikulo nga “Malungkot Kahit na Masulong ang Teknolohiya sa Komunikasyon.”
a The Global State of Social Connections, by Meta and Gallup, 2023.