Ta Liggu, Nobiembre 20, 2022, nabalin i COP27 United Nations Climate Change Conference. Minanugu i aru nga nagatende tatun nga mangiyawa ira tu finansial nga uffun ta mariga ira nga nasion tapenu moffunan ira ta efekto na kalamidad ira. Ngem ammu na aru nga totolay nga ari naw masolba i panguli na klima.

•   “Magayayya ngà ta naddesisiokkami nga magunnug tu fundu para ta nafektan ira na panguli na klima,” kinagi ni António Guterres, secretary-general na United Nations, turi ta Nobiembre 19, 2022. “Ngem ari tu makalanno yaw . . . Egga lagapa ta peligro i planeta tam.”

•   “Aranni tam ngana maekspiriensa i grabe nga efekto na panguli na klima.”​—Mary Robinson, dati nga presidente na Ireland anna dati nga UN High Commissioner for Human Rights, Nobiembre 20, 2022.

 Mavurung i mabbing ira para ta mappange na planeta tam. Ngem matuppal kari na nasion ira i promesa da nga solban i panguli na klima? Anni i kagian na Biblia?

 Kagian na Biblia nga maski anni i kuan anna pangikaguman na nasion ira tapenu malillitan i problema ta klima, ari da lagapa interamente nga masolba i problema. Innan i dua nga rason:

•   “Ari ngana metunung i killu.”​—Eclesiastes 1:15.

   Kebalinan na: Limitadu laman i makua na gobiernu ira megafu ta ari nga naparatu i totolay tapenu imagurayadda i baggi da. (Jeremias 10:23) Maski nu makka-uffu-uffun i nasion ira, ariadda lagapa masolba i problema ira ta mundo maski anni paga i pangikagumadda.

•   “Ta ayatan noka na totolay i baggi da, ayatadda i kuartu, . . . manaki da i makipakkasundu.”​—2 Timoteo 3:2, 3, NW.

   Kebalinan na: Natuppal i kinagi na Biblia nga aru nga totolay ta tiempo tam i mabbalin tu makasarili anna ariadda kayà i manguffun para ta pammakapianan na tanakuan.

 Ngem ari tu nakadepende ta promesa ira na gobiernu na totolay i makasta nga mappange na planeta tam. Egga i pinili na Dios nga makapangngua nga Mammaguray—si Jesu-Cristo. Kinagi na Biblia meyannung nisa:

•   “Mepaabaga sa i pammaguray. Magalan i ngagan na nga Makapabbaw nga Manabarang, Makapangngua nga Dios, Mannanayun nga Yama, Prinsipe na Imammo.”​—Isaias 9:6.

 Si Jesus i Patul ta Pappatulan na Dios, onu nelangitan nga gobiernu. (Mateo 6:10) Egga i pakapangngua na, sirib, anna pakkaraga nga tangngallan i planeta tam anna i ngamin nga maddian tatun. (Salmo 72:12, 16) Gukaban na pammagurena, daralan naw nga nelangitan nga gobiernu danuri ‘manara-daral ta davvun’ anna itoli na i makakkasta nga paddia-paddian na planeta tam.​—Nepakannammu 11:18, Isaias 35:1, 7.

 Tapenu mammuan i mas aru paga nu kunnasi nga masolba i panguli na klima, bibbigan i artikulo nga “I Efekto na Panguli na Klima ta Mappange Tam—I Kagian na Biblia.”