Sean Gladwell/Moment via Getty Images
SIGGA-SIFU KAMU!
Maturu $2 Trillion i Nagastu na Gobiernu ta Interu Mundo Para ta Military—Anni i Kagian na Biblia?
Ta 2022, magadde ta 2.24 trillion U.S. dollars i nagastu na gobiernu ta interu mundo para ta military. Resulta yatun na pangatake na Russia ta Ukraine. Segun ta report nga na-release ta Abril 2023 na Stockholm International Peace Research Institute (SIPRI), ta 2022:
I nagastu na gobiernu na Europe para ta military da ay “minatannang tu 13 porsiento tatun nga dagun, yatun ngana i kadakallan nga nagastu na gobiernu ira ta Europe namegafu turi ta nabalin i cold war.”
“Minatannang i nagastu na gobiernu na Russia para ta military da tu ma-9.2 porsiento yatutta ira ngana i mekatallu ta kadakallan nga nagastu ta interu mundo imbes tu mekalima dati.”
Nattalupaddian i United States bilang nasion nga egga pinakadakal nga nagastu na para ta military, “naggafu ta nira i 39 porsiento ta nagastu na gobiernu ta interu mundo para ta military da.”
Kunnaw i kinagi ni Dr. Nan Tian, coauthor ta report na SIPRI: “Ipasingan na umata-atannang nga paggastu na gobiernu para ta military ta nappasa ira nga dagun nga mas maggrabe i pattolayattam.”
Dati ngana nga nakagi ta Biblia nga mas marralaban i pinakamakapangngua ira nga gobiernu sangawe, anna nakagi gapa tatun nu anni laman i makeyawa tu kurug nga imammo.
Dati ngana nakagi ta Biblia nga mas maggrabe i parralaban
Inagalan na Biblia i tiempo nga pattolayattam tu “tiempo na panuppalan.”—Daniel 8:19.
Kinagi na Biblia ta libru na Daniel nga tatun nga tiempo, marralaban i world power ira. “Makkatubbu-tubba,” onu marralaban yatun ira nga world power tapenu mabbalin tu pinakamakapangngua ta interu mundo. Megafu tatun nga parralaban, aru nga kuartu i magasto da.—Daniel 11:40, 42, 43.
Tapenu mammuan i mas aru paga meyannung taw ta makapa-interes nga profesiya ta Biblia, girawan i video nga Natuppal nga Profesiya—Daniel Kapitulo 11.
Nu kunnasi nga mapeggan tu kurug nga imammo
Nakagi ta Biblia nga talian na Dios i gobiernu na totolay. “Mamataddag noka i Dios na langi tu tadday nga pappatulan nga ari vuluvuga madaral noka. Yaw nga pappatulan ay ari noka meyawa ta maski sinni nga totolay. Daralan anna pangultimuan noka natun ngamin danaw nga pappatulan, ay yaw laman i mattalupaddian adde noka.”—Daniel 2:44.
Aranni ngana nga irattal ni Jehova a nga Dios i kurug anna mannanayun nga imammo nga ari meyawa na totolay. Kunnasi? Daralan na nelangitan nga Pappatulan na i ngamin nga armas anna pagimmangan na i ngamin nga krimen.—Salmo 46:8, 9.
Tapenu mammuan paga i ituppal ira na Pappatulan na Dios, bibbigan i artikulo nga “‘Mannanayun i Imammo’ ta Pappatulan na Dios.”
a Jehova i ngagan na Dios nga malegan ta Biblia.—Salmo 83:18, NW.