SIGGA-SIFU KAMU!
6 Million i Natay ta COVID-19—Anni i Kagian na Biblia?
Base ta Mayo 23, 2022 nga report na World Health Organization (WHO), 6.27 million ngana i natay megafu ta COVID-19. Ngem segun ta nibalita na WHO turi ta Mayo 5, 2022, tinantia da nga mas aru paga i aktual nga bilang na natay anne tatun. Nakagi tatun nga durante ta 2020 anna 2021, “i total nga bilang na natay megafu ta taki nga COVID-19 anna natay megafu ta efekto ira na pandemic . . . ay ma-14.9 million.” Anni i kagian na Biblia meyannung ta kunnatun ira nga kaddaraddam nga trahedia?
Dati ngana nga netura ta Biblia nga egga ira i pandemic nga aru i patayan na
Dati ngana nga kinagi ni Jesus nga egga noka ira i mawwara nga “tulu-tulagan” onu kappatay nga taka-taki durante ta tiempo nga nagalan tu “pangurianan ira nga aggaw.”—Lucas 21:11; 2 Timoteo 3:1.
Matuttuppal ngana yatun nga kinagi ni Jesus. Tapenu mas aru paga i mammuammu, bibbigan i artikulo nga “Ano ang Tanda ng ‘mga Huling Araw,’ o ‘Katapusan ng Panahon’?”
Mangiyawa i Biblia tu banna-bannay
‘I Dios i paggafuan na ngamin nga uffun. Banna-bannayan na ittam ta ngamin nga ziga-riga tam.’—2 Corinto 1:3, 4.
Aru nga natayan i nabanna-bannayan ta kakkagian na Biblia. Mas aru paga i mammuammu nu innammu i artikulo ira nga “Pangarubang ta Daddam—Nu Anni Makuam” anna “I Kapianan nga Uffun Para ta Natayan Ira.”
Kagian na Biblia i permanente nga solusion
“Maparattal paray i Pammagurem. Makua i urem toye ta davvun ta kunne ta langi.”—Mateo 6:10.
Aranni ngana nga egga i kuan na “Pammaguray na Dios” tapenu “awan noka tu maski sinni nga mangikagi: ‘Mataki ngà.’” (Marcos 1:14, 15; Isaias 33:24) Girawan i video nga Anni i Pappatulan na Dios? tapenu mammuan nu anni yatun nga gobiernu ta langi anna nu anni noka i kuan natun.
Kayà mi nakuan nga mas aru i mammuammu ta kagian na Biblia tapenu mammakapia ka anna i familiam ta makoffun nga tabarang natun anna ta makakkasta ira nga promesa na.