SIGGA-SIFFU KAMU!
Niyabante na Sientista ira i Doomsday Clock—Anni i Kagian na Biblia?
Ta Enero 24, 2023, niyabante na sientista ira i Doomsday Clock a nga mas aranni ta tangnga na gabi, nga mangirepresenta ta panuppalan na mundo.
“Ta Martes, i ‘Doomsday Clock’ nga mangisimbolo ta kadaral na ngamin nga totolay ay neyabante tu mas aranni ngana ta tangnga na gabi megafu ta gerra ta Ukraine, pavvuru-vurung ta nuklear, anna grabe nga efekto na klima.”—AFP International Text Wire.
“Nipakannammu na sientista ira ta Martes nga i ‘Doomsday Clock’ ay neyali ta 90 segundo nige na mattangnga na gabi—araranni ngana i kadaral na ngamin totolay.”—ABC News.
“Niyabiso na grupo na international scientist ira nga yaw ngana i pinakadelikadu nga paddia-paddian na totolay.”—The Guardian.
Aranni ngana kari i panuppalan na totolay anna na mundo? Maganassing kari ittam ta mappange? Anni i kagian na Biblia?
I mesimmu ta mappange
Segun ta Biblia, “mattalupaddian tu mannanayun i davvun” anna “maddian [i totolay] taw tu mannanayun.” (Eclesiastes 1:4; Salmo 37:29) Ari gafu nga pabbalinan na totolay i davvun tu ari mapaddianan onu daralan yatun.
Ngem egga i kinagi na Biblia nga panuppalan. Angngarigan na, kinagi na nga “mapawan i mundo.”—1 Juan 2:17.
Tapenu mammuan i kebalinan na panuppalan na mundo nga egga ta Biblia, bibbigan i artikulo nga “Malapit Na Ba ang Katapusan ng Mundo? Sinasabi Ba sa Bibliya na Magugunaw ang Mundo?”
Tapenu mammuan i kagian na Biblia ta mesimmu ira ta mundo, bibbigan i artikulo nga “Kailan ang Katapusan ng Mundo?”
Mabbalin tu positibo
Uffunan ittam na Biblia nga mabbalin tu positibo maski nu aru i problema ta mundo. Kunnasi?
Mangiyawa i Biblia tu praktikal ira nga tabarang. (2 Timoteo 3:16, 17) Angngarigan na, bibbigan i artikulo nga “Anni i Kuammu Tapenu Ari Ka Kuruga Mavuru-vurung?” tapenu mammuan nu kunnasi naka moffunan na Biblia nga mabbalin tu positibo maski nu aru nga problema i meparubang nikaw.
Mangiyawa i Biblia tu kurug nga iddanama ta mappange. (Roma 15:4) Iyesplika na nu anni i ekspektattam sangawe anna ta mappange nga makoffun nittam nga mabbalin tu positibo maski nu anni paga i mesissimmu ta mundo.
Tapenu mammuan i mas aru paga ta Biblia, purueban sangawe i libre nga paggigiammu tu Biblia nga egga i manguffun nikaw.
a “Nadisenio i Doomsday Clock tapenu abisowan i publiko meyannung ta araranni ngana nga kadaral na mundo megafu ta delikadu nga efekto na teknolohia nga pinadday na totolay. Simbolo yatun nga mangiperaddam ta nittam nga mawag tu solbattam i problema ira tapenu tulu-tuloy nga makapattolay ittam ta davvun.”—Bulletin of the Atomic Scientists.