Massirina i totolay ta aru nga nasion megafu ta pulitika. Segun ta survey na 2022 Pew Research Center, “65% na adulto nga na-survey ta 19 nga nasion i nakkagi nga ari makka-ana-anugu i totolay ta nasiodda megafu ta nadduruma i suportadda ta pulitika.”

 Nasifutan nu kari nga mas massirina i totolay ta dian nu megafu ta pulitika? Ngatta kunnatun? Egga kari i solusion? Ammuattam i kagian na Biblia.

 Niprofesiya na Biblia nga ta tiempo tam, ta “pangurianan ira nga aggaw,” imposible nga mattaradday i aru nga totolay megafu ta ugali da.

•   “Ta pangurianan ira nga aggaw, mabbalin tu delikadu anna mariga i situasion. Ta ayatan noka na totolay i baggi da, . . . manaki da i makipakkasundu.”—2 Timoteo 3:1-3, NW.

 Maski nu kuan na totolay i ngamin nga mawayya da tapenu makkasta i gobiernu, mariga nga mesimmu yatun. Nadduruma i opinion na totolay, yatutta imposible nga mattaradday ira tapenu solban i problema. Pakurugan natun i dati ngana nga nakagi ta Biblia.

•   “Immagurayan na tolay i kasittolena ta pakaperwisiuwan na.”—Eclesiastes 8:9.

 Ngem kagian na Biblia i solusion—gobiernu nga irolluan na tadday nga makasolba ta problema ira nga mamarriga ta totolay.

 Kagian na Biblia i tadday nga lider nga makawayya nga massolba taw ira nga problema: si Jesu-Cristo. Egga i pakapangngua, autoridad, anna pakkaraga ni Jesus nga irattal i pattaradday anna imammo ta ngamin nga totolay.

•   “Mannanayun paray ta katolay na i katunungan; mannanayun paray i imammo.”—Salmo 72:7.

•   “Ngamin i nasa-nasion ay masserbi sa.”—Salmo 72:11.

 Si Jesus i kapianan nga lider megafu ta ikavurungan anna ikaya na nga uffunan i totolay, mas ngana danuri ari tu patas i nikatratu da.

•   “Kuragan na i mariga ira nga umagal sa tuange ta napagurayan ira anna awan tu awa-awayya da. Ikallo na i makafi anna mariga ira, anna paliaran na i inango na awan tu awa-awayya da. Ta kadara-darum anna katazza-tazzi ay kuragan na ira.”—Salmo 72:12-14.

 Ammuan i mas aru paga meyannung ta Pappatulan na Dios, i nelangitan nga gobiernu nga si Jesus i mangirollu. Ammuan nu kunnasi ka mabenefisiowan anna nu kunnasim masuportan i pammagurena.

•   Girawan i video nga Anni i Pappatulan na Dios?

•   Bibbigan i artikulo nga “Kaharian ng Diyos—Isang Gobyerno na Walang Korapsiyon.”