SIGGA-SIFU KAMU!
Ngatta Napannu tu Lussaw i Mundo?—Anni i Kagian na Biblia?
Napannu i balita ira tu makapataki ira nga uvovug, krimen, kinavayolente megafu ta pangireruma ta lahi, anna gerra megafu ta lussaw.
“Mas minaru i makapataki ira nga uvovug sangawe ta social media megafu ta gerra ta Israel anna Gaza anna ta totolay ira nga massuporta ta kinavayolente anna lussaw.”—The New York Times, Nobiembre 15, 2023.
“Namegafu ta Oktubre 7, mas paga nga minaru i lussaw ta mundo kagitta na makapataki ira nga paguvovug anna kinavayolente megafu ta pangireruma.”—Dennis Francis, president na United Nations General Assembly, Nobiembre 3, 2023.
Ari ngana bagu ta nittam i makapataki ira nga paguvovug, kinavayolente, anna gerra. Kakurugan na, kinagi na Biblia nga danuri massuporta ta gerra anna kinavayolente ay “kunna pana i maporay ira nga uvovug nga ed-da ibbattan.” (Salmo 64:3; 120:7; 140:1) Ngem ipakanawag na Biblia nga egga i importante nga kebalinan na lussaw nga masingi-singattam sangawe.
Lussaw—Seniales na tiempo nga pattolayattam
Kagian na Biblia i dua nga rason nu ngatta gagangay ngana laman sangawe i lussaw.
1. Dati ngana nga kinagi na nga “mallummin noka i aya na aru nga totolay ta ikattolay da.” (Mateo 24:12) Imbes tu ipasingan na totolay i aya, ipasingadda lallagu i ugali ira nga makagafu tapenu ikalussaw da i kataggi-tadday.—2 Timoteo 3:1-5.
2. Resulta na lussaw anna marake nga influwensia ni Satanas nga Diablo i grabe nga lussaw ta mundo sangawe. Kagian na Biblia nga i “mundo ay egga ta pammaguray na Demonio.”—1 Juan 5:19; Nepakannammu 12:9, 12.
Ngem kagian gapa na Biblia nga aranni ngana nga pangultimuan na Dios i makagafu ta lussaw. Fuera paga tatun, alsan na gapa i marake ira nga efekto na lussaw. Nipromesa na Biblia:
I Dios “funatan na ngamin i lulua da nga manuru, anna awan ngana noka tu matay, onu maraddam, onu tumangi-tangi, onu magattam ta taki. Ta napawan ngana ngamin i dana nga ganna-gannug.”—Nepakannammu 21:4.