Egga ngana i ma-70 million nga bangngag onu umal nga totolay ta interu mundo, anna aru ta nira i makikomunika gukaban na tadday ta maturu tu 200 nga sign language. Kaddaraddam, ari nga makasta i pattratu na karuan ta umal ira, gitta na masingan ta tumunug:

•   “Ta interu mundo, ari kuruga meddan tu importansia i kepangngattan na umal anna makafi i pagginna da ira.”—National Association of the Deaf (U.S.).

•   “I umal nga totolay ta mappopprogreso nga nasion i tadday ta pinaka-pobre ira, anna mariga ta nira i manga ta kepangngattan ta edukasion, trabahu, anna informasion.”—World Federation of the Deaf.

 Kunnasi imammatan na Dios i umal ira? Anni i kagian na Biblia meyannung ta umal ira? Anna kunnasi ira sangawe uuffunan na Saksi ira ni Jehova?

I Pagimamma na Dios ta Umal

 Kagian na Biblia nga kuruga ikavurungan ni Jehova a nga Dios i umal ira. Ikaya na nga patas i pattratu nira anna mabbenefisio ira ta edukasion nga iyawa na.

 Teksto: “Ariammu nga ibariaw i bangngag.”—Levitico 19:14.

 Teksto: ‘Ari nga mamadduma-ruma i Dios.’—Kingngua 10:34.

 Teksto: “Inangayan ni Jesus ngamin i ili-ili anna babario. . . . Nilayya-gayya na i Mapia nga Dumug meyannung ta Pammaguray na Dios.”—Mateo 9:35.

 Teksto: “Pagginnan [ni Jesus] maski paga i bangngag anna paguvovugan na i umal.”—Marcos 7:37.

 Teksto: “Makaginna noka i bangngag ira.”—Isaias 35:5.

 Kebalinan na: Niprofesiya ni Jehova nga makaginna i bangngag.—Isaias 29:18.

Nu Kunnasi nga Uuffunan na Saksi ira ni Jehova i Umal ta Kaggawattam

 Ilayyagayya na Saksi ira ni Jehova ta umal nga totolay ta interu mundo i mensahe na Dios meyannung ta iddanama. Anni i kukukuammi tapenu metuppal yaw? Mangipublisa kami tu Biblia anna nebase-Biblia nga video ira ta maturu tu 100 nga sign language. Mangiyofer kami tu paggigiammu tu Biblia anna mangorganisa tu nacristianuan nga pattaradday ta sign language. Kukukuammi yaw nga awan tu paga na ta ngamin nga maya mappoffun ta Dios. Ngatta? Megafu ta nidob ni Jesus: ‘Inalawa nu yaw nga awan tu paga; kuan nu gapa danaw tu ari nga kapagan.’—Mateo 10:8.

 Ma-access mu yaw ira online onu me-download mu ta gadyet mu gukaban na tumunug:

 JW.ORG. I-click i language icon ta utun na maski sitaw nga pahina taw nga website tapenu malegan i informasion ta sign language nga kayà mu.

 JW Library Sign Language app. I-install yaw nga libre nga app ta gadyet mu tapenu maka-download ka onu maka-stream tu sign language video ira.

Anni i Iyayawa Mi nga Uffun Para ta Paggigiammu tu Biblia?

 I Biblia ta sign language. I New World Translation of the Holy Scriptures ta American Sign Language i pinaka-ollu nga nakumpleto nga sign language Bible ta interu mundo. I interu onu karuan nga parte na New World Translation ay available ta aru nga sign language, anna mammungan paga yatun tu lengguahe ira kada ragun. (Tapenu innan i lista na lengguahe ira onu maggiraw tu Biblia online, innan i box nga “ I New World Translation na Biblia ta Sign Language.”)

•   Girawan i video nga The Complete New World Translation Is Available in ASL. Masingan tatun i trabahu ira tapenu makua i Biblia ta sign language.

•   Para ta mas makasta nga Bible reading, i-install i JW Library Sign Language app. Makapili ka tu espesipiko nga teksto ira ta sign language Bible taw nga app.

•   Umal nga magatawa da Dmytro anna Vita, anna egga i dua tu ana da nga ari tu umal. Innan nu kunnasi nabbenefisio i familia da ta inaggaw nga paggiraw tu Biblia ta sign language.

 Video ira nga mangituddu meyannung ta Biblia. Nangipublisa i Saksi ira ni Jehova tu sign-language nga video ira tapenu manguffun ta totolay nga malippawa anna meyaplika i praktikal ira nga tabarang na Biblia meyannung ta . . .

•   Pagatawa anna familia

•   Tinedyer anna kabataan

•   Abbarabbing

 One-on-one nga paggigiammu tu Biblia. Gigiammuan i mensahe na Biblia ta sign language nga egga i manguffun nikaw anna nakadepende ta nikaw nu kunnasi kapaddu i paggigiammu. Mar-request ka tu mabbisita nikaw tapenu mammuammu nu kunnasi nga makua yaw nga libre nga paggigiammu tu Biblia.

 Si Jeson Senajonon ay maddian ta Pilipinas. Innan nu kunnasi nakoffun ta nisa i paggigiammu tu Biblia tapenu mapeggan yayya tu madukko nga pakikkofun ta Dios.

 Si Mario Antúnez ay tadday nga pastor ta simbahan ta Honduras. Ammuan nu kunnasi na nga naleg i tabbag ta pakkiavu na ira ta Biblia ta istoria na pattolena nga “Napakaru i Pakkiavu Ku.”

 Paggarammammung anna okasion ira. Egga ira i kongregasion anna grupo mi nga sign-language ta interu mundo. Maggarammammung tatun i umal ira tapenu maggigiammu anna maddayaw ta kada ligguan. Mangiyunnug kami gapa kada ragun tu darakal ira nga okasion nga sign-language para ta paggigiammu tu Biblia. Ta paggarammammung anna okasion mi ira, egga i tactile interpreting para ta umal anna vulag ira. Egga gapa i libre nga braille literature mi.

•   Magaleg tu kongregasion aranni nikaw.

•   Ammuan i meyannung ta zinagun nga kombension anna asembli mi ira.

•   Magatende ta Memorial na patay ni Jesus, i pinaka-importante nga okasion mi kada ragun.

 Si José Luis Ayala ay maddian ta Mexico. Neyana yayya nga umal anna nabbalin yayya tu vulag. Ammuan nu kunnasi yayya noffunan tapenu mabbalin yayya tu malalaki ta panuddu tu Biblia.