Labanan i Pakatageno tu Pagitetadday Gukaban na Panguffun ta Tanakuan—I Kagian na Biblia
Aru nga totolay ta interu mundo i makatageno nga kagitta na awan tu kofudda anna magitetadday ira. Kagian na eksperto ira ta gawa-gawayyan nga i tadday nga makua tam tapenu malabanan i kunnatun ira nga panageno ay i panguffun ta tanakuan.
“Mapeggan tu gakkag i pattoletam nu uffunattam i makawag ira, anna makoffun yatun tapenu malabanattam i panageno nga kagitta na awan tu kofuttam anna magitetadday ittam.”—U.S. National Institutes of Health.
Mangiyawa i Biblia tu praktikal ira nga tabarang nu kunnasi tam nga uffunan i tanakuan. Makoffun i pangiyaplika tam tatun ira tapenu malabanattam i pakatageno tu pagitetadday.
I makuam
Mabbalin tu minangngiyawa. Magaleg tu oportunidad nga makikavulu ta tanakuan, mas ngana ta personal. Sigga-paran nga mangiyawa ta tanakuan. Nu kuammu yatun, mappabalo ira nikaw anna mabbalikkamu tu kofun.
Prinsipio na Biblia: “Iyugali nu i pangiyawa tapenu iddan nakamu na totolay.”—Lucas 6:38, NW.
Uffunan i tanakuan. Uffunammu danuri meparubang ta mariga ira nga situasion. Nelavu tatun i pagginna nira tu mapia anna panguffun nira ta praktikal tapenu malappawan ira.
Prinsipio na Biblia: “I kofun ay sigga-paran nga manguffun, ta maski anni nga situasion.”—Proverbio 17:17, Contemporary English Version.
Tapenu mammuan i mas aru paga nga informasion nu kunnasim mapattalupaddian nga makasta i relasiommu ta tanakuan, bibbigan i artikulo nga “Relasion ta Familia Anna Kokkofun.”