Turi ta Mayo 19, 2022, nammuan na United Nations Security Council i komento na maturu tu 75 nga atannang ira nga ofisial nga “megafu ta gerra ta Ukraine, mas naggrabe i pakkukurang tu makan ta interu nga mundo nga dati ngana nga afektadu na COVID-19 pandemic anna climate change, yatutta posible nga mabbisin ta karuan nga lugar.” Ari nabbayag kabalin natun, kinagi na The Economist nga “megafu ta gerra, mas umaru i mabbisin nga totolay ta interu mundo nga dati ngana nga afektadu na nadduruma nga problema.” Dati ngana nga nakagi ta Biblia nga mesimmu ta tiempo tam i kunnatun ira nga pakkukurang tu makan, ngem uffunan ittam gapa natun tapenu ammu tam i kuattam ta kunnatun ira nga situasion.

•    Dati ngana nga kinagi ni Jesus: “Maggegerra noka i nasa-nasion, kunne na gapa ta pappatulan ira. Ay mabbisin i totolay.”​—Mateo 24:7.

•    Mabibbig ta libru na Biblia nga Nepakannammu i appa nga nakakabayu. Tadday tatun ira nga nakakabayu i mangirepresenta ta gerra. I tumunug gapa ta nisa ay mangirepresenta ta bisin, i tiempo nga mariga nga makala tu makan anna sobra ngina na maka-makan. “Nasingak-ku i tadday nga kabayu nga ngisi, anna egga i agga-takay nga nanammi ta akkilowan. Ay naginnà i kagitta na ngaral . . . nga kun-na nga nakkagi, ‘Tanga-tappang nga trigu i kegatangan na taddan ta tangaggaw, anna tallu tappang gapa nga bagga i kegatangan na taddan ta tangaggaw.’”—Nepakannammu 6:5, 6.

 I dati ngana ira nga nakagi ta Biblia meyannung ta pakkukurang tu makan ay matuttuppal ngana sangawe ta tiempo tam nga agalan na Biblia tu “pangurianan ira nga aggaw.” (2 Timoteo 3:1) Tapenu mas aru i mammuammu meyannung ta “pangurianan ira nga aggaw” anna ta pattakay na appa nga nakakabayu ta Nepakannammu, girawan i video nga Dakal i Nangulian na Mundo Namegafu Turi 1914 anna bibbigan i artikulo nga “I Appa nga Nakakabayu​—Sinni Ira?”

•    Mabibbig ta Biblia i makoffun ira nga tabarang tapenu ammu tam i kuattam ta mariga ira nga situasion, kagitta na nu mangngina ira i maka-makan onu nu makkukurang i makan. Innan i karuan nga tips ta artikulo nga “Paano Ka Makakapag-adjust Kapag Nabawasan ang Iyong Kita?”

•    Mabibbig gapa ta Biblia i iddanama nga makkasta gabbalaman saw i situasion. Nipromesa natun nga duttal saw i tiempo nga ‘aru i magatab [onu, maapit] ta koman ira’ anna bastante ngana saw i makan para ta ngamin. (Salmo 72:16) Tapenu mas aru i mammuammu meyannung ta iddanama para ta mappange nga mabibbig ta Biblia anna nu ngatta makapattalo ka tatun, bibbigan i artikulo nga “Makakaasa Ka sa Isang Magandang Kinabukasan.”