SIGGA-SIFU KAMU!
Pamalattug ta Eskuela Ira—Anni i Kagian na Biblia?
Ta Mayo 24, 2022, kaddaraddam i nesimmu nga trahedia ta baddi nga ili na Uvalde, Texas, U.S.A. Segun ta The New York Times, “pinalattugan anna napatay na tadday nga lalaki i 19 nga abbarabbing anna dua nga mestra . . . ta Robb Elementary School.”
Makaparaddam ta gagangay ngana laman i kunnatun nga mesissimmu. Nireport na USA Today nga ta United States, “egga i nesimmu nga 249 nga pamalattug ta eskuela ira ta nappasa nga dagun—mas aru yatun anne ta nappasa nga daga-ragun namegafu ta 1970.”
Ngatta mesissimmu i grabe nga kinavayolente? Kunnasi tam nga marubang i marake ira nga mesissimmu? Mawawan kari paga i kinavayolente? Tabbagan na Biblia danatun.
Ngatta mabbalin tu mas vayolente i totolay ira?
Kinagi na Biblia nga egga ittam ngana ta “pangurianan ira nga aggaw” nu sitaw i totolay ay “awan tu allo da ta ikattolay da” anna “kitapporay.” Yatutta brutal anna vayolente i kukukuadda. “Mabbalin tu mas marakay” i kunnatun ira nga totolay. (2 Timoteo 3:1-5, 13) Tapenu mas aru paga i mammuammu, bibbigan i artikulo nga “Inihula Ba ng Bibliya na Magiging Ganito ang Ugali ng mga Tao sa Ngayon?”
Nonopan na aru nga totolay, ‘Ngatta ari fugaddan na Dios i marake ira nga mesissimmu kagitta na pamalattug ta eskuela ira?’ Tapenu mammuan i tabbag na Biblia, bibbigan i artikulo nga “Bakit Nangyayari ang Masasamang Bagay sa Mabubuting Tao?”
Kunnasi tam nga marubang i marake ira nga mesissimmu?
“Ngamin i egga ta Masanto nga Tura ay netura tapenu matudduan ittam nga magiddanama . . . nga maggafu ta Masanto nga Tura.”—Roma 15:4.
Moffunan naka na prinsipio ira na Biblia tapenu marubang i marake ira nga mesissimmu. Para ta mas aru nga informasion, innan i magazina nga Gumising! nga egga i tema na nga “Magwawakas Pa Kaya ang Karahasan?”
Para ta suhestion ira nu kunnasi nga moffunan na magana ira i ána da nga marubang i kappaganassing ira nga balita, bibbigan i artikulo nga “Ang Masasamang Balita at ang Iyong mga Anak.”
Mawawan kari paga i kinavayolente?
“Ta kadara-darum anna katazza-tazzi ay kuragan na ira.”—Salmo 72:14.
“Pabbalinadda i espada da tu aradu anna i pika da tu paggapas. Ari nga mangitayag i nasion tu espada kontra ta nasion, anna ariadda ngana vuluvuga gigiammuan i makiggerra.”—Mikias 4:3.
Kuan noka na Dios i ari nga makua na totolay. Daralan noka na nelangitan nga Pappatulan na onu gobiernu i ngamin nga armas anna pangultimuan i ngamin nga kinavayolente. Tapenu mammuan paga i ituppal ira na Pappatulan na Dios, bibbigan i artikulo nga “‘Mannanayun i Imammo’ ta Pappatulan na Dios.”