“Mas maggrabe i efekto na klima ta pallevu tam. Madakal noka i darakal ira nga siudad. Sobra i patu na pallevu. Masiki-sikan i bagiu ira. Makkurang i danum. Mawawan i minillion nga klase na mula anna aya-ayam ira. Ari yaw nga pinadda-padday nga istoria. Kunnaw i kagian na siensia nga mesimmu nu ari nga mauli i maddaggun nga reglamento ta pangusa tu enerhia.”​—Kinagi ni António Guterres, secretary-general na United Nations, meyannung ta report na Intergovernmental Panel on Climate Change turi ta Abril 4, 2022.

 “Nangabiso i sientista ira nga ta mappange ira nga dagun, maggi ngamin nga 423 nga national park [ta United States] ay madaral megafu ta climate change, anna awayyana nga madaral danatun megafu ta grabe nga patu. I kalamidad ira nga mesimmu ay kagitta na mabibbibbig tam ta Biblia: tuggi anna baha, malunag i yelo ira, paddakal na danum ta bebay anna sobra nga patu.”​—“Flooding Chaos in Yellowstone, a Sign of Crises to Come,” The New York Times, Hunio 15, 2022.

 Masolba kari paga i kadaral na pallevu? Nu wan, sinni i makasolba tatun? Ikonsidera i kagian na Biblia.

 Kagian na Biblia nga ‘daralan na Dios i totolay nga namarattal toye ta utun na davvun ta panara-daral.’ (Nepakannammu 11:18) Magigiammu tam taw nga teksto i tallu nga gannug:

1.  1. Makadaral ta davvun i kukukuan ira na totolay.

2.  2. Mangultimu i panara-daral ta davvun.

3.  3. I Dios, ari tu i totolay i makasolba ta kadaral na davvun.

 Kagian na Biblia nga “mattalupaddian tu mannanayun i davvun.” (Eclesiastes 1:4) Mannanayun nga mapaddianan yatun.

•   “I matunung ira ay irensiad-da i davvun, anna maddian ira taw tu mannanayun.”—Salmo 37:29.

 Metoli i makasta nga paddia-paddian na davvun.

•   “Magayayya noka i tana-tana anna i mamaga nga davvun, ay mappalupagia noka i disierto anna mallappaw nga kagitta na safron.”—Isaias 35:1.