SIGGA-SIFU KAMU!
Pangabiso na Pulitiko ira ta Mesimmu nga Armagedon—Anni i Kagian na Biblia?
Ta umma na Lunes, Oktubre 10, 2022, kinanna na Russia tu missile ira i siudad ira ta Ukraine megafu ta pamomba na Ukraine dua aggaw i nappasa ta importante nga tetay nga makkonekta ta Crimea anna Russia. Nesimmu yaw ira kabalin na pangabiso na pulitiko ira ta posible nga mesimmu nga Armagedon.
“Namegafu tagga ta Cuban Missile Crisis ta tiempo ni [U.S. President John F.] Kennedy, sangawe tam laman uli neparubang ta posible nga kesimmu na Armagedon. . . . Nu meyusa i nuclear weapon, siguradu nga marresulta yatun ta Armagedon.”—U.S. President Joe Biden, Oktubre 6, 2022.
“Umanugu ngà nga posible nga mesimmu i Armagedon anna mappeligro i interu planeta.”—Ukraine President Volodymyr Zelensky, turi ta neyavu nisa i posible nga efekto na pangusa tu nuclear weapon, BBC News, Oktubre 8, 2022.
Posible kari nga marresulta ta Armagedon i pangusa tu nuclear weapon ira? Anni i kagian na Biblia?
Marresulta kari ta Armagedon i pangusa tu nuclear weapon ira?
Ari. Mittan laman nga mabibbig i uvovug nga “Armagedon” ta Biblia ta Nepakannammu 16:16. Ari nga tukuyan naw i gerra na nasion ira, tukuyan lallagu naw i gerra na Dios kontra ta “patul ira ta tanga-ravvunan.” (Nepakannammu 16:14) Usan na Dios i gerra na Armagedon tapenu pangultimuan i pammaguray na totolay.—Daniel 2:44.
Tapenu mammuan i efekto na Armagedon ta davvun, bibbigan i artikulo nga Ano ang Digmaan ng Armagedon?
Madaral kari i davvun anna i totolay megafu ta nuclear war?
Ari. Maski nu posible nga mangusa i totolay ira nga mammaguray tu nuclear weapon ira ta mappange, ari nga ipamavulun na Dios nga madaral i davvun. Kagian na Biblia:
“Mattalupaddian tu mannanayun i davvun.”—Eclesiastes 1:4.
“I matunung ira ay irensiad-da i davvun, anna maddian ira taw tu mannanayun.”—Salmo 37:29.
Ngem ipasingan na profesiya ira ta Biblia anna i mesissimmu ira nga egga i mesimmu ta mappange tu daka-dakal nga panguli ta interu mundo. (Mateo 24:3-7; 2 Timoteo 3:1-5) Ammuan nu anni i kagian na Biblia meyannung ta mappange gukaban na libre nga paggigiammu tu Biblia.