SIGGA-SIFU KAMU!
Pangngina na Magatang ta Interu Mundo—Anni i Kagian na Biblia?
“Mappeligro uli i ekonomia na mundo,” kinagi na presidente na World Bank Group ta tadday nga report turi ta Hunio 2022. “Paspas nga mangngina i magatang anna serbisiu ira tapus makkurang gapa i kuartu nga paggatang na totolay.”
“Alistu nga nangngina i presio ira na gasolina anna makan, anna mas nga nafektan i totolay ira nga maddian ta mariga ira nga nasion,” kagian na International Monetary Fund.
Uffunan ittam na Biblia nga malippawa nu ngatta mesissimmu i problema ira ta ekonomia, nu kunnasi tam nga marubang yatun, anna nu anni i permanente nga solusion tatun.
Pangngina na magatang “ta pangurianan ira nga aggaw”
Nakagi ta Biblia nga mattolay ittam ngana “ta pangurianan ira nga aggaw.”—2 Timoteo 3:1.
Kinagi ni Jesus nga tatun nga tiempo, egga i “kanninipang” onu kananassing ira nga mesimmu. (Lucas 21:11) Maganassing i totolay nu sobra i pangngina na magatang ira. Mavurung ira para ta mappange da anna nu meyawa da paga i pakawagan na familia da.
Neprofesiya ta libru na Nepakannammu i pangngina na presio na makan ira tatun nga tiempo. “Naginnà i kagitta na ngaral . . . nga kun-na nga nakkagi, ‘Tanga-tappang nga trigu i kegatangan na taddan ta tangaggaw, anna tallu tappang gapa nga bagga i kegatangan na taddan ta tangaggaw.’”—Nepakannammu 6:6, I Bagu nga Pakkasinabban Anna Salmo Ira.
Tapenu ammuan paga i meyannung “ta pangurianan ira nga aggaw” anna i profesiya ta libru nga Nepakannammu, girawan i video nga Dakal i Nangulian na Mundo Namegafu Turi 1914 anna bibbigan i artikulo nga “I Appa nga Nakakabayu—Sinni Ira?”
I solusion ta ngamin nga problema ta ekonomia
“Mangipataddag ira tu babalay anna maddian ira tatun, anna mammula ira tu ubas anna kanadda i vunga na. Ari ira mangipataddag nga tanakuan i maddian, onu mammula nga tanakuan i kuman.”—Isaias 65:21, 22.
“Aru paray i magatab ta koman ira; matakkabban paray i kavukiran ta mula-mula.”—Salmo 72:16.
“Ngem kagian [ni Jehova], ‘Sangoye ay angayak-ku ngana i mazziga-riga nga pobre ira, anna i maddagi-raging nga madara-darum ira.’”—Salmo 12:5. a
Aranni ngana nga pangultimuan na Dios i ari tu patas nga sistema na ekonomia nga maekspiriensa na aru nga totolay ta interu mundo. Tapenu mammuan nu kunnasi, bibbigan i artikulo nga “Posible Ba ang Isang Patas na Sistema ng Ekonomiya?”
Ngem moffunan naka na Biblia nga marubang i pangngina na magatang ira maski sangawe. Kunnasi? Mabibbig tatun i praktikal ira nga tabarang ta masirib nga pangusa tu kuartu. (Proverbio 23:4, 5; Eclesiastes 7:12) Tapenu ammuan i aru paga, bibbigan i artikulo ira nga “Immugurammu i Pakkatolayammu” anna “Paano Ka Makakapag-adjust Kapag Nabawasan ang Iyong Kita?”
a Jehova i personal nga ngagan na Dios.—Salmo 83:18.