KAMPANIA PARA TA MEMORIAL
Pangultimuan Noka ni Jesus i Gerra
Ta kegga ni Jesus ta davvun nipasingan na i kadakal na aya na ta totolay, nisakrifisio na paga lagu i inango na para nira. (Mateo 20:28; Juan 15:13) Ta mappange, ipasingan na uli i aya na ta totolay gukaban na pangusa na ta autoridad na bilang Patul na Pappatulan na Dios tapenu “pagimmangan na i gerra ira ta tanga-ravvunan.”—Salmo 46:9.
Kagian na Biblia nu anni i kuan noka ni Jesus:
“Kuragan na i mariga ira nga umagal sa tuange ta napagurayan ira anna awan tu awa-awayya da. Ikallo na i makafi anna mariga ira, anna paliaran na i inango na awan tu awa-awayya da. Ta kadara-darum anna katazza-tazzi ay kuragan na ira.”—Salmo 72:12-14.
Kunnasi tam mepasingan i pappabalo tam ta ngamin nga kingngua ni Jesus anna ta kuan na paga para nittam ta mappange? Ta Lucas 22:19, nibilin ni Jesus ta tagatuttul na ira nga daddammadda i patay na. Yayya nga ta kada dagun, ta anibersario na patay na, mattaradday i Saksi ira ni Jehova. Imbitammi kamu nga daddamman i Memorial na patay ni Jesus sonu Liggu, Marso 24, 2024.