KAMPANIA PARA TA MEMORIAL
Pangultimuan Noka ni Jesus i Krimen
Naekspiriensa ni Jesus i mazziga-riga megafu ta krimen anna kawan na hustisia. Naakusan yayya tu falsu, naziga-riga, ilegal i kabista na, mali i panentensia da nisa, anna mataka-taki i nikapapatay na. Maski nu inosente yayya, sigga-paran nga nisakrifisio na “i inango na tapenu matavvu i aru nga totolay.” (Mateo 20:28; Juan 15:13) Bilang Patul na Pappatulan na Dios, aranni ngana nga irattal na i hustisia ta interu mundo anna permanente nga pangultimuan na i krimen ira.—Isaias 42:3.
Kagian na Biblia nu anni i kuan noka ni Jesus anna nu anni noka i paddia-paddian na mundo:
“Ta ari nga mabbayag, i marakay ira ay mapawan; maski aleram-mu ira ay ariam-mu ira nga maleran; ngem i minappakalinno ay irensiad-da i davvun, anna mattolay ira ta imammo nga mannanayun.”—Salmo 37:10, 11.
Kunnasi tam mepasingan i pappabalo tam ta ngamin nga kingngua ni Jesus anna ta kuan na paga para nittam ta mappange? Ta Lucas 22:19, nibilin ni Jesus ta tagatuttul na ira nga daddammadda i patay na. Yayya nga ta kada dagun, ta anibersario na patay na, mattaradday i Saksi ira ni Jehova. Imbitammi kamu nga daddamman i Memorial na patay ni Jesus sonu Liggu, Marso 24, 2024.