Anni i maimajimmu ta tadday nga tolay nga mavvuru-vurung? a Manono mu kari i tadday nga awan ngana tu makua na megafu ta assing na? Awan tu ganas na yari tu agga-idda ngana laman yayya? Onu puru pakavurungan na ngana laman i istorian na?

 Kunnatun i reaksion na karuan nu mavvuru-vurung ira. Ngem nammuan na researcher ira nga duma i reaksion na tanakuan mas ngana i lallaki. Kagian na tadday nga report nga i lallaki ay “mas dakal i chansa da nga minum tu binarayang anna mad-drugs nu mavvuru-vurung ira, yatutta nu mahilig nga minum i tadday, baka seniales yatun na pavvuru-vurung. Makagi gapa nga mavvuru-vurung i lalaki nu maruddu tu mabi yayya nga mapporay anna mairita.”

 Siempre, madduruma i reaksion na lallaki. Ngem maski anni paga i reaksion na tadday nga tolay, sangawe ta tiempo na “ziga-riga,” umaru la’ nga umaru i mavvuru-vurung. (2 Timoteo 3:1) Nu mavvuru-vurukka, anni i meyuffun na Biblia nikaw?

 Aru i makoffun nga tabarang na Biblia nu mavvuru-vurung ittam. Yaw i tallu tatun:

1.  1. “Arian nu nga kavurungan i mawag nu nonumma; ta egga laman i mekavurung ta kagaggaw. Arian nu ngana nga lannappan i problema nu tatun nga aggaw.”​—Mateo 6:34.

    I kebalinan na: Pammakapianattam nu ari ittam nga sobra nga mavurung ta awayya na nga mesimmu (onu ari nga mesimmu) ta mappange. Maruddu nga ari nga mesimmu i pakavurungattam. Nu mittan paga lagu, gavva laman nga makkasta i situasion.

    Purueban yaw: Nonopammu i dati ira nga pakavurungammu nga talaga siguradu ka nga mesimmu ngem ari mabba nesimmu. Pannonopammu i pakavurungammu ira sangawe. Awayya na kari nga mabbalin yatun tu dakal nga problema? Realistiko ka nakuan ta pattabbag mu tatun.

2.  2. “Nu kunnasi nga mapataram na balayang i balayang, mapataram gapa na tolay i kofun na.”​—Proverbio 27:17.

    I kebalinan na: Moffunan ittam na tanakuan tapenu ari ittam nga mavvuru-vurung. Nu mappoffun ittam gare ta nira, awayya da ittam nga iddan tu advice base ta ekspiriensa da. Baka egga paga lagu i makagi da meyannung ta situasiottam nga ari tam paga napannonopan.

    Purueban yaw: Mannono ka tu kofummu nga awayya na nga makeyawa tu makasta nga advice ta niko. Nu posible, yari i kofummu nakuan nga naka-ekspiriensa ngana ta problema nga arubangammu. Iyavu mu ta nisa nu anni i kingngua na ira nga nakoffun ta nisa.

3.  3. “Ipammakatalo nu sa ngamin i kavurungan nu ta yaya i manangngal nikamu.”​—1 Pedro 5:7.

    I kebalinan na: Talaga ikavurungan na Dios danuri mazziga-riga. Kayà na nga ikagi tam ta nisa ta pakimallo i ngamin nga pakavurungattam.

    Purueban yaw: Ilistam i ngamin nga pakavurungammu tapus ipakimallo mu ta Dios danatun. Ikagim ta nisa i problemam ira anna mappoffukka ta nisa.

 Ari laman tu makasta ira nga advice i ikagi na Biblia para turi ira ta mavvuru-vurung. Ipromesa gapa natun nga araranni ngana nga mawawan i ngamin nga pakavurungattam. Kunnasi nga mesimmu yatun?

 Alsan na Pappatulan na Dios i ngamin nga mamavvurung ta nittam. (Nepakannammu 21:4) Kakurugan na, sonu mammaguray ngana i Pappatulan, ari tam ngana nga manono i mamavvurung anna mangistress ta nittam sangawe.​—Isaias 65:17.

 Yatun i mappange nga kayà na “Dios nga paggafuan na imammo” para nikaw. (Roma 16:20) Ipromesa na ta nittam: “Ammù tu mapia i ikaya ku nga kuan para ta nikamu, . . . iddattakamu tu imammo, ari tu ziga, tapenu mapeggakkamu tu makakkasta nga mappange anna iddanama.”​—Jeremias 29:11.