SIGGA-SIFU KAMU!
Kinavayolente Megafu ta Pulitika—Anni i Kagian na Biblia?
Aru i mesimmu nga kinavayolente megafu ta pulitika ta interu mundo.
Aru nga totolay i nakaddag anna mavuru-vurung ta Mexico megafu ta pamatay ta 39 nga kandidato, mas atannang yatun ta nappasa ira nga dagun. Nakaddagan gapa ira ta kinavayolente megafu ta pulitika ta 2023-2024 nga eleksion.
Nikanni laman ta Europe, aru nga kinavayolente megafu ta pulitika i nesimmu, nelavu tatun i maggi pamatay ta prime minister na Slovakia ta Mayo 15, 2024.
Nakaddag gapa i taga-United States ta maggi pamatay ta dati nga presidente nga si Donald Trump ta Hulio 13, 2024.
Ngatta napakaru i kinavayolente megafu ta pulitika? Mangultimu paga kari yatun? Anni i kagian na Biblia?
Neprofesiya nga massirina i totolay megafu ta pulitika
Niprofesiya na Biblia nga ta kaggawattam, nga magalan tu “pangurianan ira nga aggaw,” aru nga tolay i mangipasingan tu ugali ira nga marresulta tu kinavayolente anna passirina.
“Ta pangurianan ira nga aggaw. . . . ariad-da nga ammu i mabbala-balo, . . . kitapporay, . . . traidor paga noka ira, ariad-da nonopan i kuad-da, atatannang i paningannad-da ta baggi da.”—2 Timoteo 3:1-4.
Niprofesiya gapa na Biblia nga ta kaggawattam aru i marrebelde kontra ta gobiernu anna paggurulu ta pulitika. (Lucas 21:9) Ngem mangultimu noka i kinavayolente ta pulitika anna passirina.
I pangultimu na kinavayolente ta pulitika
Nipakanawag na Biblia nga talianan noka na Dios i ngamin nga gobiernu na totolay tu nelangitan nga gobiernu na.
“Mamataddag noka i Dios na langi tu tadday nga pappatulan nga . . . pangultimuan noka natun ngamin danaw nga pappatulan, ay yaw laman i mattalupaddian adde noka.”—Daniel 2:44.
Pattaraddayan na Pappatulan na Dios i totolay anna egga i imammo ta interu mundo.
Magalan i Mammaguray nga si Jesus tu “Prinsipe na Imammo,” anna siguraduan na nga “awan tu pagaddetan na . . . imammo.”—Isaias 9:6, 7.
Maski sangawe gigiammuan ngana na immagurayan na nu kunnasi nga mattolay tu memammo. Megafu tatun, kinagi na Biblia: “Poppokadda noka i espada da ira tapenu mabbalin tu taram na aradu anna i pika da ira tapenu mabbalin tu paggapas. Ari noka nga mangiyoddu tu espada i nasion kontra ta tanakuan nga nasion, ni tu maggigiammu paga ira tu pakiggerra.”—Isaias 2:3, 4.
Tapenu mammuan i aru paga, bibbigan i artikulo nga “Ano ang Gagawin ng Kaharian ng Diyos?” anna girawan i video nga Anni i Pappatulan na Dios?
Baka Kaya Mu Gapa i
PASSIFUSIFUTAN
Anni i Kuan na Pappatulan na Dios?
Ammu ni Jesus nga i Pappatulan na Dios laman i gobiernu nga makasolba ta problema ira ta davvun. Anni ngana i nakua na Pappatulan tapenu makapattalo ittam tatun?
SIGGA-SIFU KAMU!
Ari Ngana Mattalo i Totolay ta Pulitiko Ira—Anni i Kagian na Biblia?
Pagaramman ittam na Biblia nga magimugug ta pattalakkattam anna ituddu na i pattalakkattam nga mangiyawa tu makasta nga mappange.
SIGGA-SIFU KAMU!
Ngatta Mamassirina i Pulitika?—Anni i Kagian na Biblia?
Mas massirina i totolay ta interu mundo megafu ta pulitika. Kagian na Biblia i solusion—tadday nga lider nga mamattaradday ta ngamin nga totolay.
PASSIFUSIFUTAN
Sinni i Pinili na Dios nga Mammaguray?
TUTTUDDU NA BIBLIA
Purueban i Paggigiammu tu Biblia
Purueban i paggigiammu tu Biblia nga egga i manguffun nikaw.
