SIGGA-SIFU KAMU!
Relihion Anna i Gerra ta Ukraine—Anni i Kagian na Biblia?
Kunnaw i mabibbig ira nga komento meyannung ta lider ira na relihion anna ta gerra ta Ukraine:
“Ari vuluvuga kinontra na head na Russian Orthodox Church nga si Patriarch Kirill i pangatake nga kukukuan na Russia. . . . Mangiwara-wara tu kinaladdug i relihion nga irolluan na meyannung ta Ukraine anna yatun gapa i usu-usan ni Putin nga rason ta pakiggerra na.”—EUobserver, Marso 7, 2022.
“Kakkagian ni Patriarch Kirill . . . nga yatun nga pangatake na Russia ta Ukraine ay parte laman na pappursigi da nga labanan i pagangngua ta liwa.”—AP News, Marso 8, 2022.
“Turi ta Lunes, binendisionan na lider na Ukrainian Orthodox Church nga si Metropolitan Epiphanius I na Kyiv i totolena tapenu ‘makillaban kontra ta pangatake na Russia’ . . . Kinagi na gapa nga ari nga liwa i pamatay ta suddalu ira nga Russian.”—Jerusalem Post, Marso 16, 2022.
“Suportammi i Armed Forces of Ukraine anna i ngamin nga mangidefensa ta nasiommi, bendisionammi i ngamin nga kukukuadda tapenu idefensa i Ukraine kontra ta kalaban, anna ipakimallo mi ira.”—Kinagi na UCCRO, a Pebrero 24, 2022.
Anni i makagim? Mepangngo kari para ta relihion ira nga makkakkagi nga tuttuladda si Jesu-Cristo nga pagaramman i miembro da ira nga makiggerra? Anni i kagian na Biblia?
I pakiparte na relihion ta gerra ta nappasa
Base ta history, supu-suportan na relihion i pakiggerra, ngem palawanadda nga kukukuadda yatun para ta imammo. Piga dekada ngana nga uuffunan na Saksi ira ni Jehova i tanakuan tapenu ipasingan i pagappappe natun ira nga relihion. Yaw i karuan ta angngarigan ira nga nakagi ta publikasiommi.
Mabibbig ta artikulo nga “Ang mga Krusada—Isang ‘Kalunus-lunos na Ilusyon’” nga Romano Katoliko i makagafu ta masaker ira nga para kanu ta ngagan na Dios anni Cristo.
Mabibbig ta artikulo nga “Ang Iglesya Katolika sa Aprika” nga awan tu nakua na relihion tapenu fugaddan i parralaban na tribu, anna maski i pangufu ta lahi.
Nepakanawag ta artikulo ira nga “Masisisi ba ang Relihiyon?,” “Ang Bahagi ng Relihiyon sa mga Digmaan ng Tao,” anna ta “Ang Relihiyon ay Pumapanig” nu kunnasi nga parehu nga sinuportan na lider ira na Katoliko, Orthodox, anna Protestante i makkalaban ira nga grupo onu nasion ta aru nga gerra.
Mepangngo kari para ta Cristiano ira nga massuporta ta gerra?
Nituddu ni Jesus: “Ayatam-mu i ikattolem ta kunna pangaya mu ta baggim.” (Mateo 22:39) “Ayatan nu i mangontra nikamu.”—Mateo 5:44-47.
Ikonsidera: Puede kari nga kagian na tadday nga relihion nga tuttuttuladda i bilin ni Jesus nga ayatan i kasittoleda nu pagarammadda mabba i miembro da nga makiggerra? Tapenu matabbag yatun, bibbigan i artikulo ira nga “Ang Tunay na mga Kristiyano at ang Digmaan” anna i “Posible Kayang Ibigin ang Kaaway?”
Kinagi ni Jesus: “I pammagurayak-ku ay awan toye ta utun na davvun. Ta nu taw nakuan, makillaban nakuan i totolè tapenu ariad-dà nga magafu.” (Juan 18:36) “Ngamin i mangiyusa ta espada ay matay gabbalaman ta espada.”—Mateo 26:47-52.
Ikonsidera: Nu ari nga nakillaban i Cristiano ira tapenu protektan si Jesus, mepangngo kari nga makillaban ira megafu ta tanakuan nga rason? Bibbigan i artikulo nga “Dapat Bang Sumali sa Digmaan ang mga Kristiyano?” tapenu mammuan nu kunnasi nga sinuttul na nappollu ira nga Cristiano i ehemplo anna tuttuddu ni Jesus.
Anni noka i mesimmu ta relihion ira nga massuporta ta gerra?
Ituttuddu na Biblia nga ikalussaw na Dios i relihion ira nga makkakkagi nga Cristiano ira ngem ari da mabba nga tuttulan i nituttuddu ni Jesus.—Mateo 7:21-23; Tito 1:16.
Mabibbig ta libru na Nepakannammu nga para ta Dios, i kunnatun ira nga relihion i makagafu ta patay na ‘ngamin nga totolay ta tanga-ravvunan.’ (Nepakannammu 18:21, 24) Tapenu mammuammu nu ngatta, bibbigan i artikulo nga “Ano ang Babilonyang Dakila?”
Kinagi ni Jesus nga madaral i ngamin nga relihion nga ikalussaw na Dios megafu ta marake nga kukukuadda, gitta na ‘katomba anna ketabbo ta afi’ na marakay nga kayu nga marakay i vunga na. (Mateo 7:15-20) Bibbigan i artikulo nga “Malapit Na ang Wakas ng Huwad na Relihiyon!” tapenu mammuan nu kunnasi nga mesimmu yatun.
Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images
a Kasali ta UCCRO, onu Ukrainian Council of Churches and Religious Organizations, i 15 nga relihion nga mangirepresenta ta Orthodox, Greek anna Roman Catholic, Protestant, anna karuan paga ira nga sekta kunne na gapa i Judio anna Muslim ira.