Ta interu nga mundo, aru nga totolay nga makkakkagi nga tumuttul ira kani Jesu-Cristo i makikkialam ta pulitika. Supu-suportan na karuan i kandidato onu partido ira ta pulitika tapenu mas mabbalin tu popular i kuru-kurugan na relihiodda anna i estandarte da ira ta moral. Usu-usan gapa na pulitiko ira i isyu ira ta moral onu isyu ira ta komunidad tapenu mala da i passuporta na relihioso ira nga totolay. Gagangay ngana laman gapa nga makkandidato i lider ira na relihion. Ta karuan gapa nga nasion, i tadday nga relihion nga “Cristiano” kanu ay awayya na tu mabbalin nga pinakarelihion ta nasiodda.

 Para nikaw, mepangngo kari nga makialam ta pulitika danuri tumuttuttul kani Jesu-Cristo? Mammuammu i tabbag nu innammu i kingngua ira ni Jesus. Kinagi na: “Niddat-takamu tu apparigan tapenu kuan nu gapa i kunne ta kingnguà nikamu.” (Juan 13:15) Anni kari nga apparigan i nipasingan ni Jesus nu meyannung ta pulitika?

 Ari. Ari vuluvuga nakialam si Jesus ta pulitika na mundo.

 Awan ta plano ni Jesus i mabbalin tu lider ta pulitika. Nammanaki yayya nga pammagurayan i totolay turi ta niyofer ta nisa ni Satanas nga Diablo “ngamin i pappatulan ta utun na davvun.” (Mateo 4:8-10) a Mittan paga lagu, napansin na totolay nga mepappangngo si Jesus nga mabbalin tu lider da yari tu finersa da yayya nga tullung ta pulitika. Kagian na Biblia: “Turi ta matageno ni Jesus tu umay nga apan na totolay yaya tapenu fersad-da nga pabbalinan tu patul, nanaw mangana yaya anna minay nga nagittatadday ta kabakulugan.” (Juan 6:15) Ari nga pinagustuan ni Jesus i kayà na totolay. Ari yayya nga nakialam ta pulitika.

 Awan tu pinanigan ni Jesus ta isyu ira ta pulitika. Angngarigan na, ta tiempo ni Jesus, makaporay i Judio ira megafu ta mawag nga mappaga ira tu tax ta gobiernu na Roma. Para gare ta nira, ari nga patas yatun. Turi ta pinuruebadda nga makkiavu kani Jesus nu anni i panigan na tatun nga isyu, ari yayya nga nakiddebate nu patas kari yatun nga tax nga mawag tu pagadda. Kinagi na ta nira: “Iyawa nu ta Emperador i kukua ira na Emperador anna iyawa nu ta Dios i kukua ira na Dios.” (Marcos 12:13-17) Neutral onu awan vuluvuga tu pinanigan ni Jesus tatun nga isyu ta pulitika. Ngem nipasingan na nga mawag tu mapagan i tax nga ikikkiddaw na gobiernu na Roma nga mangirepresenta ta Emperador. Nituddu gapa ni Jesus nga ari tu mawag nga tuttulan na tadday nga tolay i ngamin nga ikikkiddaw ta nisa na gobiernu. Gare, ari nga mepangngo tu iyawa na tadday ta gobiernu i gannug ira nga para ta Dios, nelagum i debosion anna paddayaw.​—Mateo 4:10; 22:37, 38.

 Sinuportan anna nituddu ni Jesus ta tanakuan i meyannung ta gobiernu ta langi, i Pappatulan na Dios. (Lucas 4:43) Ari yayya nga nakialam ta pulitika megafu ta ammu na nga i Pappatulan laman na Dios i maketuppal ta kayà na Dios nga mesimmu para ta davvun, ari tu i gobiernu ira na tolay. (Mateo 6:10) Ammu na gapa nga ari tu i gobiernu ira na tolay i usan na Pappatulan na Dios. Lallagu, talianan natun nga Pappatulan na Dios i gobiernu ira na tolay.​—Daniel 2:44.

 Ari. Sinuttul na tagatuttul ira ni Jesus i bilin na nga ‘ari nga makiparte ta mundo.’ (Juan 15:19, NW ) Pinarigadda si Jesus anna ari ira vuluvuga nakialam ta pulitika na mundo. (Juan 17:16; 18:36) Imbes tu makialam ira ta isyu ira ta pulitika, kingngua da i nipatrabahu ni Jesus—i pangilayyagayya anna panuddu meyannung ta Pappatulan na Dios.​—Mateo 28:18-20; Kingngua 10:42.

 Pinaka-importante ta Cristiano ira ta ollu nga siglo i pattuppal da ta Dios, ngem ammu da gapa nga mawag tu ikakua da i mammaguray ira ta gobiernu. (Kingngua 5:29; 1 Pedro 2:13, 17) Nattuppal ira ta dorob anna nappaga ira tu tax. (Roma 13:1, 7) Kurug tu ari ira nakialam ta pulitika, ngem inapprobetcha da i proteksion anna serbisiu ira nga niyawa na gobiernu.​—Kingngua 25:10, 11; Filipos 1:7.

 Manawag ta Biblia nga ari vuluvuga nakialam ta pulitika si Jesus onu i tagatuttul na ira ta ollu nga siglo. Cristiano gapa i Saksi ira ni Jehova yatutta kanayun ira nga neutral. Kagitta na Cristiano ira ta ollu nga siglo, kukukuadda i nipatrabahu ni Jesus—ilayyagayya da ‘yaw nga mapia nga dumug na Pammaguray na Dios.’—Mateo 24:14.