Kunnaw i nireport na United Nations:

•   Namegafu ta Oktubre 7 adde ta Oktubre 23, 2023, maturu tu 6,400 ngana i natay anna 15,200 i na-injure megafu ta gerra na Gaza anna Israel, aru ta nira i sibilyan. Fuera paga tatun, rinivu ngana i nagevacuate.

•   Ta Setiembre 24, 2023, egga ngana i 9,701 nga sibilyan i natay anna 17,748 i na-injure ta Ukraine megafu ta gerra na Russia anna Ukraine.

 Anni nga iddanama i iyawa na Biblia para ta nafektan ira na gerra?

 Niprofesiya na Biblia nga “pagimmangan na [Dios] i gerra ira ta tanga-ravvunan.” (Salmo 46:9) Usan na i nelangitan nga gobiernu, onu pappatulan, tapenu talian na i ngamin nga gobiernu na totolay. (Daniel 2:44) Alsan na Pappatulan na Dios i ngamin nga pazziga-riga na totolay.

 Kunnaw i kuan ni Jesu-Cristo nga Patul na Pappatulan na Dios:

•   “Kuragan na i mariga ira nga umagal sa tuange ta napagurayan ira anna awan tu awa-awayya da. Ikallo na i makafi anna mariga ira, anna paliaran na i inango na awan tu awa-awayya da. Ta kadara-darum anna katazza-tazzi ay kuragan na ira.”—Salmo 72:12-14.

 Alsan na Pappatulan na Dios i ngamin nga daddam anna ziga-riga nga resulta na gerra anna krimen.

•   “Funatan na ngamin i lulua da nga manuru, anna awan ngana noka tu matay, onu maraddam, onu tumangi-tangi, onu magattam ta taki. Ta napawan ngana ngamin i dana nga ganna-gannug.”—Nepakannammu 21:4.

 Dakal nga panguli i araranni ngana nga kuan na Pappatulan na Dios para ta davvun. Dati nga kinagi na Biblia nga egga i gerra ira nga mesimmu anna madumug tam. Mesissimmu ngana yatun ira sangawe. (Mateo 24:6) Ipasingan natun ira anna na karuan paga nga mesissimmu nga mattolay ittam ngana “ta pangurianan ira nga aggaw” na pammaguray na totolay.—2 Timoteo 3:1.