SIGGA-SIFU KAMU!
Talaga Kari nga Mapattaradday na Olympics i Totolay?—Anni i Kagian na Biblia?
Ta 2024 Summer Olympics, mallima billion nga totolay i maggiraw ta atleta ira nga maggafu ta 206 nga nasion nga makipartisipa ta Olympics. “Parte ittam na tadday nga event tapenu pattaraddayan nga memammo i interu mundo,” kunni Thomas Bach, presidente na International Olympic Committee. “Selebrattam i Olympics megafu ta mamattaradday yatun anna memammo nga makkaravulu i ngamin nga totolay, maski nu madduruma ittam.”
Makua kari na Olympics i kunnatun ira nga goal? Egga paga kari i iddanama nga mesimmu i imammo anna pattaradday?
Talaga kari nga mabbalin tu memammo anna mattaradday i totolay?
Ari laman tu meyannung ta isports i Olympics sangawe nga dagun. Ipasingan gapa natun i social anna politikal ira nga isyu nga mamassirina ta totolay. Nelavu taw ira nga isyu i human rights, pangireruma megafu ta lahi, diskriminasion ta relihion, anna padduruma.
Kakayà na totolay nga girawan i internasional ira nga isport kagitta na Olympics. Ngem masingan gapa taw ira nga event i ugali anna annangngua ira na totolay nga mamassirina nira imbes tu marresulta nakuan yatun ta imammo anna pattaradday.
Kagian na Biblia i ugali ira na totolay nga mamarriga ta pattaradday na mundo. (2 Timoteo 3:1-5) Tapenu mammuan i mas aru paga meyannung taw nga profesiya na Biblia, bibbigan i artikulo nga “Inihula Ba ng Bibliya na Magiging Ganito ang Ugali ng mga Tao sa Ngayon?”
Kurug nga iddanama ta imammo anna pattaradday
Mabibbig ta Biblia i kurug nga iddanama ta imammo anna pattaradday ta interu mundo. Nepromesa tatun nga mattaradday i ngamin nga totolay ta mundo anna immagurayan na nelangitan nga gobiernu nga magalan tu Pappatulan onu “Pammaguray na Dios.”—Lucas 4:43; Mateo 6:10.
I Patul natun nga Pappatulan nga si Jesu-Cristo i mangirattal noka ta imammo ta interu mundo. Kagian na Biblia:
“Mannanayun paray ta katolay na i katunungan; mannanayun paray i imammo.”—Salmo 72:7.
“Kuragan na i mariga ira nga umagal sa . . . Ta kadara-darum anna katazza-tazzi ay kuragan na ira.”—Salmo 72:12, 14.
Sangawe paga laman, pinattaradday ngana na tuttuddu ira ni Jesus i minillion nga totolay ta 239 nga nasa-nasion. Bilang Cristiano, nagigiammu na Saksi ira ni Jehova ta interu mundo i mabbalin tu memammo. Tapenu mammuan nu kunnasi, bibbigan i isyu na magazina nga Passifusifutan nga nateman tu “Nu Kunnasi nga Maffu i Lussaw.”