SIGGA-SIFU KAMU!
Trillion Ngana i Nagastu ta Gerra—Yatun Laman Kari i Nisakrifisio Da?
Aru i nesakrifisio ta gerra.
“Ta nappasa nga dagun, magadde ta $2.2 trillion i nagastu na gobiernu ira ta interu mundo ta pakiggerra. Mas dakal yatun anne ta nagastu da ta nappasa ira nga dagun.”—The Washington Post, Pebrero 13, 2024.
Ngem ari laman tu kuartu i nesakrifisio. Ikonsidera i tadday nga angngarigan: I gerra ta Ukraine.
Suddalu. Segun ta eksperto ira, ma-500,000 nga suddalu i natay onu na-injure, dua ragun i nappasa ta namegafu i gerra.
Sibilyan. Segun ta United Nations, maturu tu 28,000 i natay onu na-injure. Ngem kagian na tadday nga senior UN official: “Ariattam nga mabilang nu kunnasi i karu na totolay nga nafektan na gerra.” a
Ara-aru nga totolay i nazziga-riga megafu ta gerra anna parralaban ta interu mundo.
114 million. I bilang na totolay nga nafuersa nga manaw ta balay da megafu ta gerra anna kinavayolente ta interu mundo namegafu ta Setiembre 2023.
783 million. I bilang na totolay nga meparubang ta pakkurang na makan. “I gerra i pinaka-rason na pakkurang tu makan, 70 porsiento na totolay nga makkurang tu makan i maddian ta lugar ira nga afektadu na gerra anna kinavayolente.”—World Food Programme.
Mangultimu paga kari i gerra? Egga kari noka i imammo? Duttal kari i tiempo nga abundansia ngana i makan anna awan ngana noka tu bisin anna pazziga-riga? Anni i kagian na Biblia?
Tiempo na gerra
Dati nga neprofesiya ta Biblia nga egga i maggegerra, nadeskriba yatun nga simboliko nga nakakabayu.
“Ay limittuag i tadday mangana nga kabayu nga makalozzin. Yuri i agga-takay ay neddan ta dakal nga espada anna pakapangngua nga mamaggegerra ta totolay ta utun na davvun tapenu makkapata-patay ira.”—Nepakannammu 6:4.
Egga paga i dua nga tumuntubag ta simboliko nga nakakabayu, irepresenta da i bisin anna patay megafu ta tulagan onu tanakuan paga. (Nepakannammu 6:5-8) Tapenu mas aru paga i mammuattam meyannung taw nga profesiya na Biblia anna nu ngatta makasiguradu ittam nga matuttuppal ngana yatun ta kaggawattam, bibbigan i artikulo nga “I Appa nga Nakakabayu—Sinni Ira?”
Memammo nga mappange
Ta mappange, ari ngana meyusa noka ta gerra i gannug ira nga egga ta mundo. Ngem ari yaw nga megafu ta totolay. I kagian na Biblia:
I Dios “pagimmangan na i gerra ira ta tanga-ravvunan.”—Salmo 46:9.
Alsan noka na Dios i marake nga efekto na gerra. “Funatan na ngamin i lulua da nga manuru, anna awan ngana noka tu matay, onu maraddam, onu tumangi-tangi, onu magattam ta taki. Ta napawan ngana ngamin i dana nga ganna-gannug.”—Nepakannammu 21:4.
Siguraduan na Dios nga memammo i pattolay na ngamin. “Maddian noka i totolè ta memammo nga lugar, ta arayyu ta peligro ira nga paddianan anna ta ari matannug ira nga pagibannaggan.”—Isaias 32:18.
Segun ta profesiya ta Biblia, i gerra anna karuan paga nga mesissimmu sangawe ipasingan na nga aranni ngana i tiempo nga memammo ngana i ngamin.
Kunnasi nga irattal na Dios i memammo nga mappange? Irattal na yatun gukaban na nelangitan nga gobiernu, onu Pappatulan. (Mateo 6:10) Tapenu mammuan nu anni yaw nga Pappatulan anna i meyuffun naw nikaw, girawan yaw nga ababba nga video nga Anni i Pappatulan na Dios?
a Miroslav Jenca, United Nations assistant secretary-general for Europe, Disiembre 6, 2023.