SIGGA-SIFU KAMU!
I Mekadua nga Dagun na Gerra ta Ukraine—Anni i Iddanama nga Iyawa na Biblia?
Ta Biernes, Pebrero 24, 2023 i anibersario onu i tanga-ragun na pamegafu na gerra ta Ukraine. Segun ta karuan ira nga report, ma-300,000 ngana nga suddalu ira na Ukraine anna Russia i natay onu nabigaran anna natakitan. Ma-30,000 gapa nga totolay i pagabbo da nga natay ta gerra. Ngem awayya na nga mas atannang paga tatun i bilang da.
Kaddaraddam megafu ta gitta na ari paga mangultimu yaw nga gerra.
“Mattanga-ragun ngana namegafu ta sinallung na Russia i Ukraine anna gitta na ari paga magimmang yatun nga gerra. Ari gapa siguradu nu sinni i mangaffu nira, anna gitta na imposible nga makaleg ira tu solusion nga pakka-anugutadda.”—NPR (National Public Radio), Pebrero 19, 2023.
Aru nga totolay i maraddam megafu ta pazziga-riga nga iyawa naw nga gerra ta aru nga inosente nga totolay ta mundo. Anni nga iddanama i iyawa na Biblia? Magimmang paga kari i gerra?
I gerra nga pangultimuan na i ngamin nga gerra
Egga i kagian na Biblia nga gerra nga mangipaliag ta totolay, ari nga manaral nira. Magalan yatun tu Armagedon, anna yatun nga gerra i “dakal nga Aggaw na Dios nga Makapangngua sa Ngamin.” (Nepakannammu 16:14, 16) Gukaban natun nga gerra, pangultimuan na Dios i pammaguray na totolay—i rason na napakaru ira nga gerra. Tapenu mammuan nu kunnasi marresulta ta mannanayun nga imammo i Armagedon, bibbigan i tumunug ira nga artikulo: