Vegan nga Lifestyle—Anni i Kagian na Biblia?
Ta interu mundo, aru nga totolay i interesadu ta veganism.
“I veganism ay appana-panono anna istilo na pattolay nga lillitadda adde ta posible nga takitan onu usan i ayam para ta makan, passinnun, onu tanakuan paga nga keyusan.”—The Vegan Society.
Fuera paga ta pangikavurung ta aya-ayam, pinili na karuan i mabbalin tu vegan megafu ta kayà da nga mapakasta i pallevu, gawa-gawayyadda, onu megafu ta relihioso nga rason.
“Ari tu kagitta na nadduruma nga diet, imammatan na totolay i veganism bilang pangurug, moral nga desision, anna i makua na tadday tapenu mapakasta i paddia-paddian na interu mundo.”—Britannica Academic.
I veganism kari i solusion tapenu makkasta i pappangetan na planeta tam? Anni i kagian na Biblia?
I paningan na Namaratu ta totolay anna ayam ira
Kinagi na Biblia nga i Namaratu nittam nga si Jehova nga Dios, a mas atannang i paningan na ta totolay anne ta ayam ira anna niddan na tu pakawayya i totolay nga immagurayan ira. (Genesis 1:27, 28) Tapus nipamavulun na Dios nga awayya kanan na totolay i ayam ira. (Genesis 9:3) Ngem ari na ipamavulun i pammaltratu ta nira.—Proverbio 12:10.
Segun ta Biblia, personal nga desision i pakkakan tu karne. b Maski nu kuman ittam tu karne onu ari, ari nga nakadepende tatun i paningan nittam na Dios. (1 Corinto 8:8) Ari tam nakuan uyawan i maski sinni megafu laman ta pinili da nga kanan.—Roma 14:3.
I kurug nga solusion ta makasta nga mappange
Kagian na Biblia nga ari solban na istilo na pattolay tam i problema ira ta mundo. I kegafuan gare na aru nga problema ay pulitikal, social, anna i sistema na ekonomia ta mundo nga ari masolba na totolay. Kagian na Biblia:
“Ari ngana metunung i killu.”—Eclesiastes 1:15.
I Namaratu tam i massolba ta problema tam ira. Nangusa i Biblia tu figuratibo ira nga uvovug tapenu ideskriba i kuan na noka.
“Ta kabalin naw, nasingak-ku i bagu nga langi anna bagu nga davvun, ta awan ngana yuri i dana nga langi anna davvun. Awan gapa ngana i bebay.”—Nepakannammu 21:1.
Talian na Dios i gobiernu na totolay, onu “i dana nga langi,” tu “bagu nga langi,” i nelangitan nga Pappatulan. Alsan na Pappatulan na ‘i dana nga davvun,’ danuri i marake ira, anna pammagurayan na i “bagu nga davvun,” onu danuri makimoray ta autoridad na.
Ta pammaguray laman na Pappatulan na Dios nga memammo i paddia-paddian anna pavvulu na ayam ira anna totolay.—Isaias 11:6-9.
a Jehova i ngagan na Dios.—Salmo 83:18, NW.
b Nibilin na Biblia nga “ari kamu nga kuman . . . tu daga.” (Kingngua 15:28, 29) Kebalinan na yaw nga ari ittam minum tu daga onu kuman tu karne nga ari napadaga; onu kuman tu maski anni nga nakivuan tu daga.