SIGGA-SIFU KAMU!
Talaga Kari nga Mapattaradday na World Cup i Totolay?—Anni i Kagian na Biblia?
Mallima nga billion nga totolay i ekspektadda nga maggiraw ta FIFA World Cup nga mamegafu ta Nobiembre 20 adde ta Disiembre 18, 2022. Iddanaman na aru nga i kunnatun ira nga pagiraw tu isport ay daka-dakal i efekto na ta totolay, anna ari laman tu basta pakatageno tu pattaradday nu girawadda yatun.
“Egga i pakapangngua na isport nga ulian i mundo. Egga i pakapangngua na nga paguyuan i totolay. Egga i nerumu-ruma nga pakapangngua na nga pattaraddayan i totolay.”—Nelson Mandela, dati nga presidente na South Africa.
“Pattaraddayan na football i iddanama, pagayayya, paginteresan, aya, maski egga i padduruma.”—Gianni Infantino, presidente na FIFA. a
Mapattaradday kari na World Cup onu maski anni nga pagiraw tu isport i kunnatun ira nga goal? Egga paga kari i iddanama nga mesimmu i imammo anna pattaradday?
Talaga kari nga mapattaradday na i totolay?
I World Cup taw nga dagun ay ari laman tu meyannung ta football. Megafu taw nga pagiraw tu isport, pabbiridan na totolay i nadduruma nga isyu nelavu ngana i human rights, pangireruma, anna ekonomia.
Maski nu kunnatun, kakayà laggapa na totolay nga girawan i internasional ira nga isport kagitta na World Cup. Ngem maski nu kakayà yatun na totolay, ari na laggapa nga permanente nga mapattaradday i totolay. Maruddu lallagu nga ipasingadda i mamassirina nga ugali anna annangngua ira nga kinagi na Biblia nga seniales na tiempo nga magalan tu “pangurianan ira nga aggaw.”—2 Timoteo 3:1-5.
Kurug nga iddanama nga pattaradday
Mabibbig ta Biblia i kurug nga iddanama nga pattaradday ta interu mundo. Nepromesa tatun nga mattaradday i ngamin nga totolay ta mundo anna immagurayan na nelangitan nga gobiernu nga magalan tu Pappatulan onu “Pammaguray na Dios.”—Lucas 4:43; Mateo 6:10.
Siguraduan na Patul natun nga Pappatulan nga si Jesu-Cristo nga egga noka i imammo ta interu mundo. Kagian na Biblia:
“Mannanayun paray ta katolay na i katunungan; mannanayun paray i imammo.”—Salmo 72:7.
“Kuragan na i mariga ira nga umagal sa . . . Ta kadara-darum anna katazza-tazzi ay kuragan na ira.”—Salmo 72:12, 14.
Sangawe paga laman, pinattaradday ngana na tuttuddu ira ni Jesus i minillion nga totolay ta 239 nga nasa-nasion. Nagigiammuda nga ari mallussaw ta tanakuan. Tapenu mammuan i mas aru paga, bibbigan i serye na artikulo ira nga egga i tema na nga “Nu Kunnasi nga Maffu i Lussaw.”
a Fédération Internationale de Football Association, i international governing body for association football (soccer).