Ta aru nga nasion tulu-tuloy nga mangngina i kawagan ta pattolay nga mamarriga ta totolay, nelavu i Saksi ira ni Jehova. Ngem imbes nga mavvuru-vurung, mabanna-bannayan i Saksi ira ta pakannammu nga ‘ari ira vuluvuga nga panawan’ ni Jehova. (Hebreo 13:5) Kanayun nga tuppalan ni Jehova yatun nga promesa. Kunnatun i nesimmu ta Pilipinas, nasion nu sitaw aru i mariga nga totolay. Ngem mas mariga i pattolay tatun nga nasion tagga ta 1970 magadde ta 1980.

 “Nu mittan maka-tangi ngà megafu ta awan tu kanammi,” kinagi na sister nga si Vicky a. “Egga ira i tiempo nga inafi, asin, anna danum laman i egga nikami.” Ari makaleg tu trabahu i tadday nga brother nga si Florencio. Kunna: “Egga laman i tallu nga sinnukku anna pantalokku nga patturubbakakku nga usan ta study anna asembli ira.” Kunnasi yatun inarubang na totolay ni Jehova? Anni i nakoffun nira nga tulu-tuloy nga masserbi kani Jehova? Anna kunnasi nga makoffun i ehemplo da sangawe nittam nu manguli i situasiottam?

 Nattalo i Saksi ira ta Pilipinas nga tangngallan ira ni Jehova tatun nga mariga nga tiempo. (Hebreo 13:6) Anna maruddu nga ariadda ekspektan i panguffun na nira. Angngarigan na, manono na tadday nga sister nga si Cecille: “Kabalimmi nga nilutu i nabattang nga tanga-basu nga bagga mi para ta paggug mi, awan ngana tu nabattang nga kanan na familia mi. Yatutta nakimallo kami nga iyawa ni Jehova i pakawagammi tatun nga aggaw. Turi ta maddagukkami kuman, nangiyangay nikami i tadday nga brother tu lima kilo nga bagga. Makatangi kami ta pagayayya mi anna pappabalo mi ta bendision ni Jehova. Aru paga i ekspiriensa mi nga kagitta natun.”

 Kunne na gapa, niyaplika na totolay na Dios i ka-uto nga maggafu ta Biblia. (Proverbio 2:6, 7) Angngarigan na, i bagu bawtisadu nga si Sister Arcelita nga single bi tatun nga tiempo anna mariga i pattolay na, nipakimallo na kani Jehova i ngamin nga pakavurungan na. Pinannonopan na i Proverbio 10:4, nakagi tatun: “Mamarriga i talakag nga lima, ngem mamarriku i malallappo nga lima.” Kayà na nga iyaplika yatun yari tu nammula yayya tu gulay ira. “Binendisionan ni Jehova i pappursigì,” kunna. “Makalanno i nagulay ku ira para ta kanakku anna sakto ta pamasahè i balor na ngamin nga nilakù.”

 Kurang i fundu na wawwaragi ta paggatang tu davvun anna pappataddag tu Kingdom Hall. Ngem ari nga yatun i nakefugag nira ta panuttul da ta bilin nga maggarammammung anna pagaramman i kataggi-tadday. (Hebreo 10:24, 25) Kingngua da i adde na mawayya da. Angngarigan na, kinagi na sister nga si Deborah: “Annam kami nga magatende ta study ta baddi nga kubo nga kingngua mi na kavvulu ku nga payunir. Nangusa kami tu don na nipa para ta ato na, natalapig nga don na niyug para ta zizzing na, anna fun na niyug para pagitubangngammi.”

 Maruddu nga ta babalay ira nga magistudy. “Napadday ta mimi anna vulu i baddi nga balemi,” kunni Sister Virginia. “Iyali mi i gamit mi kada Sabadu megafu ta tatukkami nga magistudy ta tumunug nga aggaw.” Ta tanakuan nga balay manuru i ato da. “Nu magurang,” istorian ni Brother Noel, “mangipay kami tu baldi ta panurukan na ato. Maski nu kunnatun, naka-fokus kami lagapa ta passerbi kani Jehova, kavvulu i wawwaragi.”

 Ari napakarianan i talikarag na Saksi ira ta ministerio maski nu mariga ira. Kinagi ni Lindina, nga taga-Negros: “Megafu ta dakal i familia mi anna i yamà laman i magaleg, ari makalanno i kuartu mi para ta pamasahe. Yatutta maruddu nga lumakag kami paumay ta teritoria mi. Ngem kappagayayya yatun megafu ta aru kami. Ammu mi gapa nga magayayya si Jehova ta pappursigi mi.”

 Mariga gapa i mallayyagayya ta arayyu nga teritoria megafu ta maggi awan tu pattakayan. Istorian ni Esther nga taga-Luzon: “Magummumma i grupo mi nga 6 adde ta 12 nga wawwaragi megafu ta aru nga kilometro i lakarammi. Tangaggaw kami nga mallayyagayya. Mabbalukkami tu makan anna kumakkami ta lirum na kayu. Awan tu balun na karuan nga wawwaragi ngem umay lagapa ira. ‘Ariannu mavurung,’ kagiammi. ‘Egga i makalanno nga makan, para ta ngamin.’”

 Binendisionan ni Jehova i passakrifisioda. Angngarigan na, tagga ta 1970, egga i 54,789 nga publisher ta Pilipinas. Tagga ta 1989, maggi naddoble yatun nga biladda, 102,487 i publisher ira. Ta 2023 gapa, nagadde ngana ta 253,876 i bilang na mangilayyagayya ta Pappatulan ta Pilipinas.

 Maski nu mariga i pattolay na wawwaragi ira, magayayya ira anna malallappo ira nga masserbi kani Jehova. “Ari nakefugag nikami i ziga na pattolay ta passerbi kani Jehova,” kunni Brother Antonio. Naobserba ni Sister Fe Abad: “Nu meparubakkami na atawà ta ziga na pattolay, mas mattalo kami kani Jehova anna naekspiriensa mi i pagayayya ta pattolay tu simple. Bilang resulta, nagigiammu gapa na ána mi nga mattalo nisa.”

 “Ari tu problema i ziga na pattolay ta passerbi kani Jehova,” kunni Lucila, nga taga-Samar. Kunna paga nga “nu ipoppollu tam i Dios mabbalin ittam tu kontentu anna mattalupaddiattam nga positibo. Magayayya ngà nga mammuan na i-Bible study ira si Jehova anna kavulu ku ngana gapa ira sangawe tu payunir.”

 Megafu ta ammu tam nga mas mariga i mappange, daddammattam i kinagi na tadday nga elder nga si Rodolfo, nga kunna: “Ta pattolè ta mariga nga tiempo tagga ta 1970 magadde ta 1980, natageno ku i suporta anna aya niakan ni Jehova. Maski nu baddi laman i kuartù, ari ngà nga napagurayan. Sinangngallan nà tu mapia ni Jehova. Makagì tu makasta i pattolè ta sangawe anna iddanamakku i ‘kurug nga pattolay’ ta Paraiso.”​—1 Timoteo 6:19.