Nappasimple Kami
Makasta i pattolay ni Madián anna Marcela ta Medellín, Colombia. Atannang i sueldu ni Madián yari tu makakkasta i apartment tu paddianadda. Ngem egga i namaguyu ta nira nga pannonopan uli i prayoridadda bilang aripan ni Jehova nga Dios. Istoriadda: “Turi ta 2006, nagatende kami ta espesial nga asembli nga nateman tu ‘Keep Your Eye Simple.’ Kakaruan tatun nga palappa i nangipasigo ta pappasimple tu pattolay tapenu mas mapasserbian i Dios. Kabalin na asembli, nanono mi nga balittag i kukukuammi. Gatakkami la nga gatang maski awan tu badyet mi para tatun yatutta dakal i gatu nga mawag tu pagammi.”
Megafu tatun ira nga naginna da Madián anna Marcela, pinegafuanadda i nappasimple. Kinagi da: “Binawasammi i paggastuammi. Nagali kami ta mas baddi nga apartment, nilaku mi i takemi, anna naggatang kami ngana laman tu motor.” Nagimmang gapa ira nga umay ta mall tapenu ariadda nga matenta nga gumatang. Inammungadda i tiempo da nga makibbida ta karruba da meyannung ta Biblia. Nakikavulu gapa ira ta special pioneer nga kokkofudda nga malallappo nga masserbi kani Jehova nga Dios. a
Ari nabbayag, nadesision da Madián anna Marcela nga palawan i ministerio da. Plano da i magali ta baddi nga kongregasion ta bario nga magawag tu uffun. Tapenu makua da yatun, nar-resign si Madián. Gafu tatun, kinagi na supervisor na nga arian na usu-usan i uto na. Yatutta nappakkiavu nisa si Madián: “Aru i kuartum Ma’am, ngem magayayya ka kari?” Inamin na supervisor na nga ari yayya magayayya megafu ta napakaru i problema na nga ari na masolusionan. Yari tu kinagi ni Madián ta nisa: “Ari gafu tu i karu na kuartu Ma’am i importante ta pattolay. Mas importante nu anni talaga i mamagayayya ta niko. Mamagayayya niakan anna ta atawà i panuddu ta totolay meyannung ta Dios anna ikaya mi i mabbalin tu mas magayayya. Yari tu ammungammi Ma’am i tiempo mi para tatun nga trabahu.”
Nakontentu anna nabbalin tu kuruga magayayya si Madián anna Marcela ta paggawa da ta espiritual ira nga goal da. Ta nappasa nga 13 dagun, nasserbi ira ta kongregasion ira ta northwest Colombia nga dakal i pakawagan na. Sangawe, pribilehio da i masserbi bilang special pioneer.
a I special pioneer ira ay sinunno na branch office na Saksi ira ni Jehova tapenu mallayyagayya tu ngamin-tiempo ta tadday nga lugar ta nasiodda. Makalawa ira tu allowance nga makalanno para ta paggastuadda.