“Kakku vuluvuga naimajin nga kekkaru i makuà ta passerbì kani Jehova.” Kunnatun i mataga-tageno ni Gwen nga dati bi nga taga-England meyannung ta pan-need-greater onu passerbi na ta Albania nu sitaw mas dakal i pakawagan. a

 Tadday laman si Gwen ta aru nga Saksi nga nagali ta Albania tapenu manguffun ta pangammung ta “nabalor nga ganna-gannug na ngamin nga nasion.” (Hageo 2:7) Anni i namaguyu ta nira? Anni ira i inadjust da tapenu makali ira? Anni ira i bendision da nga nakoffun tapenu tulu-tuloy ira ta asayment da maski nu egga ira i mariga nga situasion?

 Para-parehu laman i namaguyu ta ngamin nga wawwaragi nga minay nanguffun ta Albania: Iddukadda si Jehova anna kayà da nga uffunan i tanakuan nga makannammuan gapa yayya.

 Nige da nga nagali, egga ira i kingngua da tapenu mapalawa i ministerio da. Nakoffun danatun ta mariga ira nga situasiodda ta passerbi ta tanakuan nga nasion. Kagian ni Gwen: “Naj-join ngà labbi ta tadday nga Albanian group ta diammi. Tapus nappasiar ngà ta Albania tapenu makikombension. Turi kua, nappasiar ngà uli tari anna nabbayag ngà tu baddi tapenu gigiammuakku paga i lengguahe da.”

 Tagga ta 23 anios si Manuela, nagali yayya ta tanakuan nga lugar ta nasion na nga Italy tapenu uffunan i tadday nga baddi nga kongregasion. Kagian na: “Appa-ta-ragun ngà nga nasserbi tari. Tapus nakannammuakku nga dakal i pakawagan ta Albania. Yayya nga niplanò nga mappayunir tari tu piga vulan.”

 Pitu laman i dagun ni Federica tagga ta nakaginna yayya tu report ta kombension meyannung ta Albania. Kagian na: “Yari i brother nga nangireport, kinagi na nga aru nga Bible study i mapegafuanan na wawwaragi ta Albania tapus makikkistudy danuri interesadu. Kinagì ta magana ku nga kayà ku i mappa-Albania. Nakaddag ira tatun, ngem kinagi ni Daddy ta nio, ‘Ipap-pray mu yatun ana ku, ta nu uray ni Jehova yatun, magga tabbagan na.’ Nappasa i piga vulan, nembitakkami nga tanga-familia tapenu masserbi ta Albania!” Nappasa i aru nga dagun, nekasal si Federica kani Orges. Makkavulu ira nga nappayunir ta Albania.

 Tagga ta nar-retire ngana si Gianpiero, nagali ira na atawa na nga si Gloria ta Albania. Kagian na: “Ta Italy mi nga pinadakal i ána mi nga lallaki. Tapus nagali i tallu ta nira ta tanakuan nga nasion nu sitaw egga i pakawagan. Na-touch kami gapa na atawà ta tadday nga artikulo ta Bantayan nga nateman tu ‘Maaari Ka Bang Tumawid sa Macedonia?’ Nabbidammi dua nu kunnasi mi nga ibadyet i pension ku tapenu makali kami ta Albania.”

 Mawag tu mapplano tu mapia i need-greater ira anna egga ira i adjustment tu kuadda tapenu makali. (Lucas 14:28) Kasali ta iplano da ay nu kunnasi da saw nga suportan ta finansial i baggi da. Tagga ta egga paga ta England si Gwen nga nakagi ta gafu, nakikabbalay labbi yayya ta manang na tapenu makatipid yayya. Istorian gapa ni Sophia anna ni Christopher nga dati gapa nga taga-England: “Nilaku mi i takemi anna i karuan tu gamit mi. Plano mi nga maddian ta Albania tu maski tanga-ragun laman.” Ngem mas mabayag ira nga nakapaddian tari.

 Egga i karuan tu need-greater nga maddian tu piga vulan ta Albania tapus manoli ira ta nasiodda tapenu mattrabahu anna magunnug tu kuartu, tapus manoli mana saw ira ta Albania. Kunnatun i kingngua da Eliseo anna Miriam. Istorian ni Eliseo: “Si Miriam nga atawà ay maddian bi ta tadday nga tourist spot ta Italy, nu sitaw maba-mabi laman i makaleg tu temporario ira nga trabahu. Umay kami tatun nga lugar anna mattrabahu kami tu tallu vulan ta summer, tapus usammi i nonnug mi ta paddiammi ta Albania ta tumunug nga siam-ma-vulan. Lima ragun nga kingngua mi yatun.”

 Nu nakali ngana i need-greater ira, mawag tu makibagay ira ta bagu ira nga paddia-paddian. Dakal nga uffun ta nira i suhestion anna i kukukuan na Saksi ira tari tapenu maka-adjust ira ta mariga ira nga situasion. Kunnaw i kagian ni Sophia nga nakagi ta gafu: “Nu winter ta Albania, kitallamming ta babalay kumpara ta nakasanayakku ta diammi. Nagigiammù nu kunnasì nga ibagay i passinnukku megafu ta pagobserbà ta sister ira tari.” Si Grzegorz anna i atawa na nga si Sona ay dati bi nga taga-Poland, tapus nan-need greater ira ta makakkasta nga ili na Prizren ta Kosovo. b Istorian ni Grzegorz: “Minappakalinno i Saksi ira tari, kitassippo ira, anna kitappasensia! Napakaru i niyuffudda ta nikami, maski i paggigiammu tu lengguahe da. Nituddu da gapa ta nikami nu sitaw ira i paggatangan tu mappo anna nu kunnasi i mamalengke.”

 Nakoffun tari ira ta nasserbi ta tanakuan nga nasion i madukko nga pakikkofudda ta Saksi ira tari anna i pakannammu da ta nappasa-pasan na wawwaragi. Istorian ni Sona: “Nemammatakku mismu i panguli na totolay megafu ta aya ni Jehova. Napasikan na wawwaragi i pangurug ku megafu ta nasingakku nga talaga inuli da i pangurug da anna i pattoleda kustu nakannammuadda i meyannung kani Jehova. Ta kongregasion gapa, natageno mi nga kawagan i uffummi. Nakavulu mi ta passerbi danuri wawwaragi nga nabbalin ngana tu kokkofummi.” (Marcos 10:29, 30) Kagian ni Gloria: “Aru nga sister i nammammù nga inattammadda i grabe nga pameppersigi na kalugaradda ira nga manaki ta Saksi. Anni ngana mabba kasta na nga masingan i pangaya da kani Jehova.”

 Egga gapa ira i makasta nga nagigiammu na need-greater ira nga ari da nga nagigiammu ta nasiodda. Angngarigan na, nasingadda nga mas mamagayayya ta nira nu kuadda i gannug ira nga ari da nga nakasanayan tapenu mas mapasserbian si Jehova. Kunnaw i kagian ni Stefano meyannung tatun: “Ta diammi, maruddu nga ta intercom ngà laman nga mallayyagayya anna abbarabba laman i presentasiokku. Ngem mahilig nga makistoria tu mabayag i Albanian ira, jebi nu makkafa-kafe ira. Gafu ta talaga minappasiran ngà, magalangan ngà ta ollu anna kakku ammu nu anni i ikagì. Ngem ta pappasa na tiempo, nasanay ngà gabbalaman nga makibbida ta totolay, anna mas enjoy ku ngana sangawe i makistoria ta nira. Mas magayayya ngana i ministeriò.”

 Maggafu ta United States, nagali ta Albania si Leah kavulu i atawa na nga si William. Kagian na: “Ta passerbi mi taw, nabbalikkami tu mas open-minded anna aru i nagigiammu mi nu kunnasi i mattolay. Nabbalikkami gapa tu mas minammadulo, minangngirespeto, anna minakkikofun. Egga ira i bagu nga nagigiammu mi nu kunnasi i mallayyagayya, mangipakanawag tu teksto ira, anna makibbida ta tanakuan.” Kagian ni William: “Aru ta mappasiar ira ta Albania ay magustuadda i makkarasta nga bebay. Nu ta nio gapa, kakayà ku i ma-hiking ta Albanian Alps. Ngem i pinakanagustuakku taw ay i totolay! Aru nga teritoria mi nga babario i malayyagayyan laman durante na espesial ira nga kampania. Nu umay kami ta diadda, tangaggaw kami nu kua tari tapus mga piga laman nga familia i makibbida mi.”

 I pinakanamagayayya tatun ira nga need-greater ay i pakasingan nga magginna i totolay ta mapia nga dumug. (1 Tesalonica 2:19, 20) Kunnatun i naekspiriensa na single sister nga si Laura nga kabataan paga kustu nagali ta Albania. Kagian na: “Nasserbi ngà ta Fier, ngem ari kuruga mabayag. Ta dua-gaddua laman nga ragun, 120 nga Bible study i nabbalin tu publisher! Tatun nga bilang, 16 i ni-Bible studỳ!” Kunnaw gapa i meraddamman na tadday paga nga sister nga si Sandra: “Nap-preach ngà ta tadday nga babay nga mattrabahu ta palengke. Tapus nabbalin yayya tu Saksi anna nanoli yayya ta dati nga bario da. I last nga balita ku, 15 i Bible study na!”

 Karuan nga nan-need greater ta Albania piga ragun ngana i nappasa ay egga lagapa tari anna e-enjoy da lagapa i serbisiu da. Nu mittan makaddagan ira nga makasingan tu navvunga gabbalaman kabalin na piga dagun i bini na kinakurug nga nimula da. (Eclesiastes 11:6) Kunnaw i kagian ni Christopher nga nakagi ta gafu: “Nasimmuakku i tadday nga lalaki nga ni-Bible studỳ ta ollu nga dattal ku ta Albania. Na-touch ngà kustu detalyadu nga inistoria na ta nio i ollu nga nabbidammi meyannung ta Biblia. Sangawe, baptized ngana ira na atawa na.” Kagian ni Federica nga nakagi ta gafu: “Ta tadday nga kongregasion, inarannian nà na tadday nga sister anna niyavutan na nio nu manono ku paga yayya. Istorian na nio nga nap-preach ngà bi ta nisa siam nga ragun ngana i nappasa. Kustu nagali ngà ngana ta tanakuan nga ili, nappa-Bible study balo yayya adde ta ma-baptize. Abbo ku bi nga ari navvunga i ollu ira nga ragun nga pinaddiammi ta Albania. Ari balo!”

 Mappabalo yari ira i wawwaragi nga nagali ta Albania onu ta Kosovo gafu ta nasingadda nga binendisionan ni Jehova i sakrifisio da ira anna makapagayayya i pattoleda. Kunnaw i kagian ni Eliseo meyannung ta piga dagun nga passerbi na ta Albania: “Gafu ta totolay ittam laman, mabi ittam laman nga melogo. Baka nonopattam nga mabbalin tu makasta i pattoletam nu maddepende ittam ta gannug ira nga ikonsidera naw nga mundo nga mamakasta ta pattolay. Ngem ilusion laman danatun. I kurug, i prinsipio ira ni Jehova i mamagayayya anna mamakasta ta pattoletam. Gafu ta pinasserbì bilang need-greater, kanayukku nga meraddamman yatun. Matageno ku tu makasta i pinangusà ta pattolè anna importante i kukukuakku. Aru i nabbalin tu kurug nga kokkofukku nga kaparehù gabbalaman tu goal ta pattolay.” Kunnatun gabbalaman i kagian ni Sandra: “Tagga ta nagali ngà nu sitaw mas dakal i pakawagan, natageno ku nga niddan nà ni Jehova tu chansa tapenu matuppal i nabayag ku ngana nga goal—i mabbalin tu misionero. Kakku vuluvuga pabbabawyan i pinagali ku ta Albania. Fermi i ayayya ku.”