Busy i Saksi ira ni Jehova ta Bulgaria ta panuddu ta tanakuan meyannung ta Dios anna ta Biblia. Tapenu moffunan ira tari, aru nga Saksi maggafu ta tanakuan nga nasion i nagali ta Bulgaria namegafu turi ta 2000. Anni ira i mariga nga situasion nga meparubang turi ira ta magali ta tanakuan nga nasion tapenu mallayyagayya? Ngatta sulit yatun? Yaw i niyistoria na karuan nga nagali ta Bulgaria.

 Kunnaw i niyistoria ni Darren nga taga-England: “Talaga goal mi i mav-volunteer ta tanakuan nga nasion nu sitaw mas dakal i pakawagan. Kabalin na kasal mi ni Dawn, nagali kami ta London tapenu manguffun ta panuddu tu Biblia ta lengguahe nga Russian. Namippiga mi ngana nga pinlano nga magali ta tanakuan nga nasion, ngem egga ira i nadduruma nga rason nu ngatta ari nga natuloy yatun. Abbo mi nu ari mi ngana nga makua yatun, ngem inuffunan nakami na tadday nga kofummi tapenu masingammi nga okay ngana i situasiommi anna puede mi ngana nga makua i goal mi.” Yayya nga nagaleg da Darren anna Dawn tu nasion nga mas dakal i pakawagadda para ta manuddu tu Biblia nu sitaw puede ira magali. Turi ta 2011, nagali ira ta Bulgaria.

 Magayayya danuri nagali ta tanakuan nga nasion tapenu mav-volunteer. Megafu ta ekspiriensa da ira, napagaram gapa i karuan nga ta gafu na ay awan mabba ta goal da i mav-volunteer ta tanakuan nga nasion. Taga-Italy da Giada anna i atawa na nga si Luca. Kunnaw i niyistoria na: “Egga ira i nakilalà nga malallappo nga sister nga mav-volunteer ta South America anna ta Africa. Naappresià i niyistoria da ira nga ekspiriensa da. Talaga magayayya ira. Nakoffun yatun niakan tapenu uliakku i goal ku ira ta espiritual.”

 Maggafu ta Czech Republic, nagali da Tomasz anna Veronika ta Bulgaria turi ta 2015, kavulu i dua nga ana da nga da Klara anna Mathias. Anni i namaguyu ta nira tapenu magali? Istorian ni Tomasz: “Ninono mi tu mapia i ekspiriensa danuri na nagali ta tanakuan nga nasion, pati i ekspiriensa na paparientes mi. Talaga magayayya ira. Nagustuammi yatun anna pabbiridammi paga lagu yatun ta balemi.” Magayayya ngana sangawe nga mallayyagayya yatun nga familia ta bagu nga teritoria da ta siudad na Montana ta Bulgaria.

 Nagali ta Bulgaria si Sister Linda. Kinagi na: “Nabbisita ngà dati ta Ecuador tapus egga ira i nakilalà nga nav-volunteer tari tapenu mallayyagayya. Megafu tatun, nanono ku nga baka puede ngà gapa nga mav-volunteer nu sitaw egga i pakawagan.” Pinannonopan gapa tu mapia na magatawa nga taga-Finland nga da Petteri anna Nadja i ehemplo na tanakuan. Kinagi da: “Ta kongregasion nga naggafuammi, egga ira wawwaragi nga nagali ta tanakuan nga lugar tapenu matudduadda i totolay meyannung ta Biblia. Kanayun ira nga masaya nu iyistoria da i tiempo ira na pinav-volunteer da. Yatun kanu i pinakamagayayya nga tiempo ta pattoleda.”

 Mawag tu mapplano tu mapia danuri mav-volunteer ta tanakuan nga nasion. (Lucas 14:28-30) Kinagi ni Nele nga taga-Belgium: “Turi ta talaga kayà ku ngana i mav-volunteer ta tanakuan nga nasion, nakimallo ngà tapus nagaleg ngà tu artikulo ira ta publikasiottam meyannung tatun. Ginigiammù danatun tapus ninono ku nu anni paga ira i mawag tu kuakku.”

 Taga-Poland da Kristian anna Irmina, ngem maturu tu siam nga dagun ngana ira ta Bulgaria. Nakagi da nga daka-dakal i neyuffun ta nira na pagatende ta Bulgarian group ta Poland nige ira nga nagali. Pinagaram ira na wawwaragi tatun anna inuffunadda ira nga magigiammu i lengguahe. Kunnaw i kinagi da Kristian anna Irmina: “Napakurug mi nga nu mappeyusa ka kani Jehova nga Dios, yayya ngana i bahala ta pakawagammu ira. Anni ngana mabba i kasta natun. Nu ikagim kani Jehova, ‘Egga ngà taw! Dobammà!’ makuam maski i gannug ira nga gitta na imposible.”—Isaias 6:8.

 Taga-Switzerland da Reto anna Cornelia. Tapenu makapapprepara ira ta pagali da anna makonnug ira, nappasimple ira. Kunnaw i istoriadda: “Tanga-ragun nige kami nga nagali, nappa-Bulgaria kami labbi tu tanga-ligguan tapenu masingammi nu kunnasi i pattolay tari. Nakibbida mi i misionero ira nga nangiyawa tu makoffun nga tabarang nikami.” Sinuttul da Reto anna Cornelia yatun ira nga suhestion. Maturu tu 20 dagun ngana ira sangawe ta Bulgaria.

 Mawag tu magadjust ta bagu anna awayya na tu mariga ira nga situasion danuri magali ta tanakuan nga nasion. (Kingngua 16:9, 10; 1 Corinto 9:19-23) Aru i narigatan nga maggigiammu tu bagu nga lengguahe. Kunnaw i kagian ni Luca nga nakagi ta gafu: “Kakayà mi i makkomento ta study, yari i ari mi nga bibbigan. Ngem ta gafu na, marigi-rigatakkami na atawà nga mapprepara maski simple laman nga komento ta Bulgarian! Gitta na nanoli kami ta pakka-abbimmi. Mas malalaki paga lagu nga makkomento i abbarabbing tari anne nikami.”

 Kagian gapa ni Ravil nga taga-Germany: “Kabbannag i maggigiammu tu lengguahe. Ngem kunnaw ngana laman i nonopakku, ‘Kammu kuruga seriosowan. Nu makkamali ka, igalo mu lapa ngay.’ Nu marigatan ngà, nonopakku nga ari tu problema yatun. Parte laman yatun na passerbì kani Jehova.”

 Kunnaw gapa i istorian ni Linda nga nakagi ta gafu: “Ari ku talaga linia i maggigiammu tu lengguahe. Mariga nga gigiammuan i Bulgarian. Mamippigà ngana lagu nanono nga magimmang ngà ‘na laman tamma. Nu ari mu gare nga makibbida i totolay tapus ari mu paga nga mantindian i kakkagiadda, talaga makkafi gapa i nono mu. Ngem tapenu masikan lagapa i espiritualidad ku, ta Swedish ngà lapa nga mappersonal study. Ta uffun na wawwaragi, nagigiammù gabbalaman yatun nga lengguahe.”

 Tadday paga nga problema ay nu sikka-labbe ka ngana anna mami-miss mu i familiam. Panawan danuri na magali ta tanakuan nga nasion i kafamilia anna kokkofudda ta diadda. Nagali si Eva anna i atawa na nga si Yannis ta Bulgaria. Inamin na: “Ta gafu na, malungkut ngà. Ngem tapenu makayanakku yatun, kanayummi nga kamustan i kokkofun anna kafamilia mi ta diammi. Tapus tawe gapa, aru i nabbalin tu kokkofummi.”

 Yaw paga i karuan ta problema. Niyistoria da Robert anna Liana nga naggafu ta Switzerland: “Talaga marigatakkami gafu ta lengguahe anna kultura taw. Nagavvatakkami gapa ta sobra i lamming taw nu winter.” Ngem nattalupaddian nga positibo yatun nga magatawa anna nagigiammu da i gumalo maski nu mariga i situasion. Katorse dagun ngana ira nga matalo nga massesserbi ta Bulgaria.

 Ipaga-pagaram ni Lilly ta tanakuan nga mav-volunteer nu sitaw dakal i pakawagan. Kinagi na: “Nu ari ngà siguru nav-volunteer ta tanakuan nga nasion, ari ku nga maekspiriensa i pia ni Jehova anna i panguffun na niakan. Megafu tatun, mas busy ngà ta panguffun ta tanakuan, nammanakam ngà ta espiritual, anna kontentu ngà.” Kunnatun gapa i natageno na atawa na nga si Ravil. Kinagi na: “Yaw i kakastan nga pattolay. Egga i chansà nga makilala i malallappo ira nga wawwaragi nga naggafu ta tanakuan nga nasion nga malalaki ta panuddu tu Biblia. Aru i nagigiammù ta nira.”

 Megafu ta aru i maya nga mav-volunteer, ‘nelayyagayya i mapia nga dumug na Pammaguray na Dios ta tanga-ravvunan.’ (Mateo 24:14) Nasingan gapa danuri nassakrifisio nga magali ta Bulgaria nu kunnasi nga neyawa ni Jehova i karagatadda anna nu kunnasi na ira inuffunan tapenu mapia i pattuppalan na ngamin nga plano da.—Salmo 20:1-4.