Egga i Purple Triangle ta Uniforme Da

I-PLAY

Maddian ta France si Maud. Mattrabahu yayya ta eskuela nu sitaw tangngawan na i abbarabbing nga egga i pisikal nga defekto da durante nga makklase ira. Mittan, ginigiammu na estudiante ira ta tadday nga klase i meyannung ta Holocaust anna Nazi concentration camp ira. Egga i nedage tu de-kulor nga patch ta uniforme danuri na nefuku tatun nga kampu. Ipasingan na kulor anna shape na patch nu ngatta nefuku i tadday nga presu.

Egga i purple triangle nga patch ta uniforme na karuan nga presu. Kunnaw i kinagi na mestru meyannung ta nira: “Siguru megafu ta homoseksual ira.” Kabalin na klase, kinibbida ni Maud i mestru anna nipakanawag na ta nisa nga inusa na Nazi i purple triangle para ta Saksi ira ni Jehova. a Niyavu na ta mestru nu awayya na kari i mangiyangay tu material ira meyannung tatun nga topiko. Minanugu yatun nga mestru anna nikiddona kani Maud nga ipresenta na yatun ira nga informasion ta estudiante na ira.

Ta tanakuan labbi gapa nga klase, inusa na tadday nga mestra i chart nga mangipasingan ta simbolo ira nga nedage ta uniforme na presu ira. Sakto i nipasingan na chart nga para ta Saksi ira ni Jehova i purple triangle. Kabalin na klase, kinibbida ni Maud i mestra anna niyavu na nu awayya na kari i mangiyawa tu material ira meyannung tatun nga topiko. Minanugu i mestra anna niyiskediul na nga ipresenta yatun ni Maud ta estudiante na ira.

Si Maud nga agga-tammi na i material ira nga niyusa na

Napprepara tu 15-minuto nga presentasion si Maud para ta ollu nga klase. Ngem turi ta mappresenta ngana yayya, kinagi da ta nisa: “Puede maski tangoras.” Nipagiraw labbi ni Maud i documentary video meyannung ta pameppersigi na Nazi ira ta Saksi ira ni Jehova. Turi ta nakagi ta video nga ina na Nazi ira i 800 nga ána na Saksi, ni-pause ni Maud i video tapus binibbig na i ekspiriensa na tallu tatun nga abbarabbing. Ta kabalin na video, binibbig ni Maud i tura na 19-anios nga Austrian nga Saksi nga si Gerhard Steinacher. Tura na yatun para ta magana na piga oras nige yayya nga pinatay na Nazi ira turi ta 1940. b

Kunnatun gabbalaman i nipresenta ni Maud ta mekadua nga klase. Mapia ngana laman ta magutu si Maud. Siguraduan ngana sangawe natun nga dua tu mestru nga tukuyadda i Saksi ira ni Jehova nu ituddu da i meyannung ta biktima ira na Nazi concentration camp ira.

a Turi ta World War II, nefuku i Saksi ira ni Jehova ta Germany megafu ta pinanakitadda nga suportan i Nazi ira. Kilala gapa ira bilang Bibelforscher onu Estudiante ira na Biblia.

b Nasentensian tu matay si Gerhard Steinacher megafu ta nammanaki yayya nga massuddalu ta Germany. Kunnaw i kinagi na ta tura na nige na natay: “Abbing ngà paga. Marubakku laman yatun nu iddan nà na Yafu tu sikan, anna yatun i ikikkiddò.” Ta kommanan na, pinatay da si Gerhard. Kunnaw i mabibbig ta lapida na: “Natay para ta dayaw na Dios.”