Turi ta 2011, zimittal ta Norway i tadday nga lalaki bilang refugee naggafu ta Eritrea. Turi ta nilayyagayyan yayya na Saksi ira ni Jehova, kinagina nira nga egga i nasimmuanna ira nga Saksi ta diadda. Niyistoriana paga nga durante nga nasserbi yayya ta militar tari, nasinganna i Saksi ira nga mefuku megafu ta pangurugda anna manakida i massuddalu maski nu marake i katratuda.

 Egga i gavva nga nesimmu ta pattolay natun nga lalaki anna megafu tatun, naaresto yayya anna nefuku. Ta affukutan, nakavuluna i tallu nga Saksi nga da Paulos Eyasu, Negede Teklemariam, anna Isaac Mogos. Nefuku ira tagga ta 1994 megafu ta pangurugda.

 Ta affukutan, nasingan mismu naw nga lalaki nu kunnasi nga iyap-aplika na Saksi ira ni Jehova i ituttudduda. Napansinna mismu nga makkakkagi ira tu kurug anna ibilleda paga lagu i makadda ta karuan nga presu. Naobserbana gapa i kasi-presuna ira nga Saksi nga makkaravulu nga maggigiammu tu Biblia kadaggaw anna agaladda paga i tanakuan tapenu mevulu nira. Nu mekagi nira nga mapalawan ngana ira ta affukutan nu maffirma ira tu tadday nga dokumento nga makkagi nga likuradda ngana si Jehova, manakida yatun.

 Daka-dakal i efektona ta lalaki na nesimmu nisa. Turi ta nagali yayya ta Norway, kayàna nga mammuan nu ngatta kunnari ngana laman i kadakal na pangurug na Saksi ira ni Jehova. Yatutta turi ta nabbisita i Saksi ira ni Jehova nisa, insigida nga pinegafuananna i mab-Bible study anna magatende ta study ira.

 Turi ta Setiembre 2018, nabawtisowan yayya bilang tadday nga Saksi ni Jehova. Kanayunna ngana kiyuvovugan i totolay nga naggafu ta Eritrea anna Sudan. Pagarammanna ira nga maggigiammu tu Biblia tapenu mapeggan tu matuyag nga pangurug.