Kabalin na bawtismo ni Zarina ta Russia, nanoli yayya ta diadda ta Central Asia. Kayàna nga padakallan i dua nga ánana nga babbay ta pangurugna bilang tadday nga Saksi ni Jehova. Ngem megafu ta baddi laman i kuartuna, maddian yayya ta apartment nga tattadday i kuartona kavulu i maganana, i wagina nga lalaki anna i atawa natun. Kinagi na maganana nga arianna tudduan i ánana tu kinakurug ira ta Biblia. Kinagida gapa ta ánana nga ariadda makibbida kani yenada meyannung ta Biblia.

 Pinannonopan ni Zarina nu kunnasina nga uffunan i ánana tapenu mammuadda si Jehova. (Proverbio 1:8) Napafutuan yayya nga nakimallo kani Jehova tapenu mappegiya anna makkiddaw tu sirib. Kingngua gapa ni Zarina i mawayyana mekunnay ta pakimallona, lumaka-lakag ira na ánana anna ipakiyuvovugna tannira i kappabbaw ira nga pinaratu. Nakoffun danatun ta ánana tapenu maginteres ta Namaratu.

 Tapus nakanono si Zarina tu kuanna tapenu matudduan paga i ánana gukaban na libru nga Anni Talaga i Ituttuddu na Biblia? a Niturana ta papel i parapo anna pakkiavu ira nga naggafu tatun nga libru. Inammunganna gapa yatun tu karuan ira nga informasion tapenu mas malippawada i material nga gigiammuadda. Nitaguna danatun nga papel anna lapis ta gukag na washing machine ta pazzigutadda. Nu egga tatun i ánana, bibbigadda i parapo ira anna iturada i tabbagda ira.

 Megafu tatun, nabalin nga nituddu ni Zarina i dua nga kapitulo na Ituttuddu na Biblia nga libru ta ánana nigeda nga nagali tu paddianan. Awan ngana tu mangontra nisa ta pamadakalna ta ánana. Ta Oktubre 2016, nabawtisowan i dua nga ánana. Magayayya ira ta nabbalin tu masirib i yenada tapenu ituddu nira i kinakurug maggafu ta Biblia.