Turi ta 2005, natay i iddeddukan nga atawa na babay nga taga-India nga si Sowbhagya. Turi ta matolay paga i atawa ni Sowbhagya, sinangngallan na ira tu mapia anna i tallu ragun nga ana da nga babay nga si Meghana. Ngem marigatan ngana sangawe si Sowbhagya nga iyawa i pakawagadda dua na ana na.

 I marake paga tatun, pammanakitan na tanakuan si Sowbhagya. Kunna pulubi i tratu na kafamilia da ta nisa anna ta ana na, anna kanayudda nga ikagi ta nisa nga mamakadammo yayya ta nira. Megafu ta nagawag si Sowbhagya tu pamanna-bannay, nagatende yayya ta tadday nga simbahan ta diadda. Ngem alalinno i paningadda nisa tari megafu ta mariga yayya. Nagaleg si Sowbhagya tu trabahu tapenu masuportan na i baggi na anna i ana na. Ngem ari yayya makaleg tu trabahu maski anni paga i kuan na.

 Istorian ni Sowbhagya: “Awan ngana tu pag-asà yari tu nanono ku ngana i mappakamatay. Ngem ammù nga marigatan saw i ana ku nu awan ngà. Yari tu nanono ku nga mas makasta nu parehu kami ngana laman nga matay.” Megafu ta natageno ni Sowbhagya nga awan tu kwenta na anna awan tu mangiddu nisa, giminatang yayya tu lason.

 Ta tren, kustu palabbe ngana si Sowbhagya, tadday nga Saksi ni Jehova nga mangngagan tu Elizabeth i minaranni ta nisa. Ta pabbida da, inistoria ni Sowbhagya nga awan tu trabahu na. Yari tu masippo nga kinagi ni Elizabeth nga duffunan na yayya nga magaleg tu trabahu. Kinagi gapa ni Elizabeth nga pa-umay yayya nga mab-Bible study. Nattaka si Sowbhagya megafu ta aru ngana nga simbahan i inatendeyan na ngem awan paga vuluvuga tu nakilala na nga mab-Bible study. Inimbitan ni Elizabeth si Sowbhagya nga mappasiar ta diadda tapenu makannammuan na paga i mas aru meyannung ta pab-Bible study.

 Ta pallabbe ni Sowbhagya, plano na lagapa i mappakamatay. Ngem nivulu na tadday nga parientes na si Meghana ta tanakuan nga lugar, yari tu nanono na nga innaggan labbi i ana na nage na ituloy i plano nga mappakamatay.

 Ta paginnag na, pinasiar na labbi si Elizabeth, anna makasta i nipangalawa na ta nisa. Tatun nga pinappasiar na, nipasingan nisa ni Elizabeth i libru nga Anni Talaga i Ituttuddu na Biblia? Naginteres si Sowbhagya ta kapitulo nga “Sitaw i Dian na Natay?” megafu ta bagu laman nga natay i atawa na. Tatun mismu nga aggaw, nappa-Bible study si Sowbhagya.

 Inimbita ni Elizabeth si Sowbhagya ta tadday nga kombension ta tumunug nga ligguan anna minay yayya. Talaga napagaram yayya tatun, yari tu nanono na nga ikaya na i mabbalin tu Saksi ni Jehova. Ta pallabbe na maggafu ta kombension, egga i nangiyofer ta nisa tu trabahu.

 Nitulu-tuloy ni Sowbhagya i mappa-Bible study. Imbes tu ikaya na bi i mappakamatay, ikaya na ngana sangawe i matolay. Na-baptize yayya anna turi kua, na-baptize gapa i ana na nga si Meghana. Sangawe, parehas ngana ira nga regular pioneer anna remote volunteer si Meghana ta tadday nga translation office ta India.

 Mappappabalo si Sowbhagya anna si Meghana megafu ta minaranni si Elizabeth kani Sowbhagya ta tren! Ipappabalo da gapa i kurug nga pangikavurung na anna i pangikagi na kani Sowbhagya ta kinakurug. Fermi gapa i appabalo da kani Jehova. Istorian ni Meghana: “Nabayag kami ngana siguru nga natay nu ari mi nga nammuan i kinakurug tatun nga aggaw. Sangawe, kuruga magayayya kami ngana. Iinnaggammi ni Mama i tiempo nga magakkopammi uli si Papa, matudduan yayya meyannung kani Jehova, anna meyistoria ta nisa nu kunnasi nga nipaliag nakami ni Jehova.”