Tadday nga Saksi ni Jehova si Virginia. Egga i taki na nga locked-in syndrome. Paralyzed i interu nga baggi na. Makasingan yayya anna makaginna, mavukatan anna meserra na i mata na, anna meguyu na gapa tu baddi i ulu na. Ngem ari yayya nga makabida onu makakan. Dati bi, magawa-gawayyan anna masikan yayya. Ngem tadday nga umma, turi ta 1997, sobra i taki na likug na ulu na anna ari nga mawawawan i taki natun. Niyangay yayya na atawa na ta hospital anna na-comatose yayya tatun gabbalaman nga gabi. Nalukag yayya kabalin na dua nga ligguan ta intensive-care unit (ICU). Ngem paralyzed anna naka-ventilator ngana yayya. Piga aggaw nga awan tu meraddamman na tu maski anni. Nakattaman na paga lagu nu sinni yayya.

 Inistoria ni Virginia i tumunug ira nga nesimmu. “Sisinu nga nanoli i memorià. Fermi i pakimallo ku. Manaki ku i matay megafu ta mawanan saw tu yena i mabbing paga nga ana ku. Tapenu massikan i nono ku, nikagumakku nga nonopan i aru nga teksto ta Biblia.

 “Ari nabbayag, nilawaddà ngana ta ICU. Nakalabbe ngà kabalin na annam nga vulan ta madduruma nga hospital anna ta tadday nga rehabilitation center. Paralyzed ngà lagapa yari tu kawagakku i uffun ta ngamin nga kuakku. Sobra nga nakkafi i nono ku! Natageno ku nga awan ngana tu kwentà para ta tanakuan anna para kani Jehova. Mavurung ngà gapa ta ari ku ngana matangngaw i ana ku.

 “Nabbibbig ngà tu ekspiriensa na karuan nga Saksi nga egga gapa i grabe nga taki da kagittà. Napagaram ngà ta kukukuadda para kani Jehova. Megafu tatun, nikagumakku gapa nga mabbalin tu positibo gukaban na paffokus ta makuà. Nige ku nga nattaki, limitadu laman i tiempò para ta espiritual ira nga aktibidad. Ngem sangawe, interu aggaw ku ngana nga makua yatun anna kada aggaw paga lagu. Imbes gafu tu pakkafiakku i nono ku, naffokus ngà ta passerbì kani Jehova.

 “Nagigiammù i mac-computer. Mat-type ngà gukaban na tadday nga software nga mar-react ta pagguyu na ulù. Kabbannag yatun ngem noffunan nà natun nga teknolohia tapenu magigiammù i Biblia anna mekagì ta tanakuan i iddanamà gukaban na tura anna e-mail. Tapenu makibbidà gapa i tanakuan, egga i board ku nu sitaw netura i letra ira na alphabet. Sinaggi-taddayan na kavulu ku nga ituddu i kada letra. Nu mali i nituddu na nga letra, vullagakku tu mapia i matà. Ngem nu fustu mabbi gapa i nituddu na nga letra, iserrà i matà. Kuammi yatun adde ta makabuu kami tu uvovug anna sentence ira. Mabi ngana laman nga mammuan na karuan nga sister nga kanayukku nga kavulu i kayà ku nga kagian. Nu mali i manono da nga uvovug, igala-galo mi ngana laman yatun.

 “Kakayà ku i makiparte ta aktibidad ira ta kongregasion. Kanayun ngà maki-tie-in ta study ira anna sangawe, gukaban ngana na videoconferencing. I-type ku i komentò ira ta study tapus ibibbig yatun na tadday nga wagi para niakan. Maki-connect ngà gapa ta field service group ku tapenu girawammi i JW Broadcasting kada vulan. a

 “Maturu tu 23 dagun ngana nga egga i locked-in syndrome ku. Maraddam ngà nu mittan. Ngem malaba-labanakku i kunnatun nga panageno gukaban na pakimallo, pakikavulu ta wawwaragi, anna pattalupaddian nga aktibo ta espiritual. Megafu gapa ta uffun na wawwaragi, maturu tu annam nga dagun ngà ngana nga auxiliary payunir. Nikagumakku gapa nga mabbalin tu makasta nga ehemplo ta ana ku nga si Alessandro. Egga ngana i atawa na anna masserbi yayya bilang elder. Regular payunir ira na atawa na.

 “Kanayukku gapa nga pannonopan i gannug ira nga makuà noka ta paraiso. I ollu nga kayà ku nga kuan sonu makabida ngà ngana ay ipakibbida i meyannung kani Jehova. Kakayà ku gapa i lumakag ta aggig na weg tapenu ma-enjoy ku i makakkasta nga pallevu. Dua dekada ngana nga pata-patallungadda i kanakku gukaban na tubo. Yari tu excited ngà ngana nga maffusi tu mansanas anna kagatan yatun. Megafu gapa ta Italian ngà, iinnaggakku ngana i tiempo nu sitaw makapallutu anna makakan ngà ngana tu faboritò ira nga makan na Italian gitta na pizza!

 “Ari nga makkafi i nono ku megafu ta ‘pagiddanama ta kapaliag.’ (1 Tesalonica 5:8) Nu maimajikku i baggì ta napabagu nga mundo, magayayya ngà ta maski nu egga i diferensià sangawe, ammù nga aranni ngana nga mawawan yatun. Excited ngà ngana para ta ‘kurug nga pattolay’ nga nipromesa ni Jehova gukaban na Pappatulan na.”—1 Timoteo 6:19; Mateo 6:9, 10.